Shillong, Jymmang 15 : U Myntri Rangbah ka Jylla Conrad K Sangma ula ong ba ka jingtohkit halor ka jingujpr pyrshah ia u Director General of Police (DGP) Lajja Ram Bishnoi ba kynnoh pyndonkam ia u nombor plate kali ba thok, kan iai bteng beit wat hadien ba ula shongthait.
“Ia ka ejahar (FIR) lah dep ban ujor bad la dep ban register, kumta ka case kan iai bteng beit, ka jingtohkit kan iai bteng beit. Ka jingshongthait kan ym ktah satia ia ka” ong u Conrad haba iakren bad ki nongthoh khubor.
“Kumba nga ong ba ia ngi, ka dei ka kam kaba suk ba haba ka jingujor ka wan man ki ejahar ki dei ki case bad kat kum ka ain, kaei kaba donkam ban hap leh bad kat kum ki kyndon, kaei kaba donkam ban leh, yn hap ban iabud ia ka, kampher mano ba dei uta u briew” ula ong.
Ha ka 9 tarik Jymmang, u Assistant Inspector General (AIG) barim ka Tnad Pulit Bah GK Iangrai ula ujor ia ka ejahar pyrshah ia u DGP ba kynnoh ba u pyndonkam bakla bad leh thok ia u nombor ba pyndait ha ka kali jong u.
Kane ka ejahar ba la mudui ha Sadar Police Station, kala wan jia ruh tang da ki sngi shuwa ba u Bishnoi un shongthait noh ka kam kata ha ka 19 tarik Jymmang.
Haba pynpaw ba ka Ain kan iaid hala ka jong ka lynti, u Myntri Rangbah ula ong “Ngi la kren shai naduh ka sngi ba nyngkong ba ha manla ki khep ba ngi iatyngkhuh bad ka ain, ka ain ka dei kaba long kumjuh ia baroh bad kumta, ka ain hi kan iaid hala ka jong ka lynti”.
U DGP ula mudui sha ka Iingkashari ban khein iap ia ka ejahar bad kam ba kane ka ejahar kam dei satia kaei kaei ruh hynrei tang ka jingkput bad buhshun pyrshah ia u namar ba la kem bad sospon ia une u Heh Pulit ha ka por jong u.
Haba kylli ba la kum kine ki jingjia ki dei kiba iahap ban don hapoh ka Tnad Pulit, u Myntri Rangbah ula ong “Em, kaba nyngkong hi, ngam ong b aka dei kaba iahap ne ym iahap, ngam tip ia kata, ngam kwah ruh ban kynthoh ia kaei kaba u DGP ula ong, ka dei ruh ka kam shimet. Ngam kwah ban kynthoh eiei halor kata”.
