Guwahati, Naitung 04: Ka President jong ka India, ka Droupadi Murmu, hynne ka sngi Thohdieng kala pyllait paidbah ia ki 3 tylli ki khusnam kyrpang jong ka Durand Cup na ka Rashtrapati Bhawan Cultural Centre (RBCC), kaba long ruh syndon ka jingplie ia ka 134th Indian Oil Durand Cup – Ka jingiakob ialehkai football kaba kongsan tam bad kaba la rim tam hapoh ka dewbah Asia.
Kane kadei ka sien ka baar ba ka President kala leh ia katei ka kam ban pynskhem ia ka jinglong ba kongsan bad kyrpang jong ka Durand Cup ha ka kam ialehkai, ka jingai jingshakri bad ia ka jingling ka ri. Kane ka jingialang ka la bteng ruh ban long kaba khraw kaba la leh naduh shwa ban ioh ia la ka jong ka ri kaba laitluid ha kaba u nongialam ba ha khliehduh u don ia ka jingiadei bad ka Durand Cup.
Ha kane ka jingialang la iadonlang u General Anil Chauhan u Chief of Defence Staff, u General Upendra Dwivedi u Chief jongka Army Staff, u Admiral Dinesh K Tripathi u Chief jongka Naval Staff, u Air Marshal Amar Preet Singh u Chief jongka Air Staff bad u Lt General RC Tiwari GOC-in-C ka Eastern Command bad Patron jongka Durand Cup Organizing Committee (DCOC). Nalor kane la iadonlang ruh u nongialehkai Football ba pawnam ka ri uba la ioh ia ka khusnam Arjuna Award u Sandesh Jhingan.
Haba kren ha ka jingialang, ka President ka ri ka Murmu kala kubur ba ka Durand Cup ka long kum ka nuksa kaba im jong ka jingialehkai Football ha ka ri India bad ka jingkular ki shipai ha ka kam ialehkai bad ka ong, “Ka Football kala don ia ka jaka kaba kyrpang ha ki dohnud jong ki million ngut. Kam dei tang ka jingialehkai, kadei ka jingieid. Ka jingialehkai Football ka dei shaphang ka buit, ka jingiai shah bad ka jingiatreilang da kaba don ia kawei ka thong. Ka jingiakob kum ka Durand Cup ym tang ba ka tei ia ka mynsiem jong ka jingialehkai hynrei ka iarap ruh ha kaban tei ia ki nongialehkai ha ki pateng ban wan, kaba ai ia ka rynsan ba kin kiew. Kala ai khublei ruh ia ka kamram jong ki shipai kiba la pynim bad kyntiew ia ka mynsiem jong ka Durand Cup.”
U Lt General RC Tiwari, GOC-in-C Eastern Command bad Patron jongka DCOC, ula banjur ba ka Durand Cup ka long kaba kongsan na ka bynta ki samla kiba donsap ha ka ri da kaba ong, “Ka Durand Cup, kaba la pynlong da ka Indian Army na ka bynta jong ki shipai baroh, ka long kaba kham iar ban ia ka jingiakob ialehkai football. Kadei ka jingrakhe ka ri India ia ka jingdon ia ka jingiatylli, ka jingngeit ha ka jinglong lyngba ka jingiakhun bad ka kamram ka jong ngi ka long ban saindur ia ki pateng ban dang wan”.
Mynta u snem, ha ka sien kaba nyngkong eh ia ka Durand Cup yn pynialehkai ha ki 5 tylli ki jylla kiba kynthup ia ka West Bengal, Jharkhand, Assam, Meghalaya bad Manipur.
Ka Durand Cup kadei ka jingiakob ialehkai kaba la rim tim ha ka dewbah Asia bad kadei ruh kaba wan balai kum ka jingiakob ialehkai kaba la rim ha kane ka pyrthei. La pynlong ia ka da ka Indian Army kum ka jingmihkhmat ia baroh 3 tylli ki kynhun shipai ka ri bad kala kylla long ruh kum ka rynsan kaba la pynmih ia ki nongialehkai kiba tbit jong ka ri India.
Ia kane ka jingiakob la sdang nyngkong eh ha Shimla ha u snem 1888, hashwa ba ia kane ka jingiakob yn rah ban pynlong noh ha New Delhi ha u snem 1940, ia kaba ka la neh haduh palat 70 snem tam.
Ha u snem 2019, ka Durand Cup kala hap noh hapoh ka jingkhmih jongka Eastern Command bad kumta la pynkynriah noh ia kane ka jingialehkai sha Kolkata kaba long kum ka Mecca jong ka football ha ka ri India kaba dei ruh ka Headquarter jongka Eastern Command. La palat ia ka 6 snem, kane ka jingiakob kala nang roi na ka jingpynlong ha kawei ka nongbah shaduh ba kala jam ban long ha kylleng ki nongbah jong ka ri.
, kaba long ruh syndon ka jingplie ia ka 134th Indian Oil Durand Cup – Ka jingiakob ialehkai football kaba kongsan tam bad kaba la rim tam hapoh ka dewbah Asia.){kind=link}