Shillong, Naitung 09 : Ka Indian Oil Durand Cup 2025, kala poi ha jingkhang bad satang khyndiat sngi, ka samoi ialehkai jong kane ka lympung kaba 134, kan sa sdang ha ki 5 tylli ki Jylla ka Ri kynthup ha Shillong, Meghalaya.
Ka jingrwai Drand Cup Anthem ka Meghalaya “Here We Go” kala nang pynshongshit shuh shuh ia ka jingwan bad ka jing sdang jong kane ka samoi ialehkai.
Ka Indian Oil Durand Cup- Ka lympung ialehkai phutbol ba rim duh ha dewbah Asia bad kawei na ki lympung ba pawnam bha jong ka pyrthei-kan sdang ha ka 23 tarik Naitung, 2025, bad ka Jylla Meghalaya sa shisien kan dei kawei na ki Jylla ba ioh ban pynlong ia kane ka lympung.
Ka trophy jong kane ka lympung kala wanpoi ha Shillong ha ka sngi Ba-ar, kaba pyni ia ka jingsdang jong ka aiom lehkai ba shibnai kynthih bad ba pynskhem ia ka jingpawnam ka Jylla ha ka map ialehai hapoh ka Ri.
Mynta u snem, kane ka lympung ialehkai kan long ha ki san tylli ki Jylla-ka West Bengal, Assam, Manipur, Jharkhand bad Meghalaya-bad ka Shillong ka shim ia ka bynta ba kongsan ban pynlong ia ki jingialehkai kiba kongsan.
U Myntri Rangbah ka Jylla Conrad K Sangma ula ong “Ka Durand Cup ha Shillong kan nang kham heh shuh shuh ha kane ka kynti ban ia u snem bala lah”.
U Myntri Rangbah ula pyllait ruh ia ka trophy roadshow na State Convention Centre ha ka jingiadonlang u Myntri kam ialehkai Bah Shakliar Warjri, ki Heh shipai ba kynthup ia u Air Marshal Suraj Singh bad Lieutenant General Sanjau Malik bad Mohit Malhotra nalor kiwei kiwei ki heh ki hain.
Haba ai jingkren, u Myntri Rangbah ula pynpaw ia ka jingsarong ba sa shisien ka Shillong kala shah jied kum kawei na ki jaka ban pynlong ia ki jingialehkai jong kane ka lumping ialehkai bala rim tam ha ka pyrthei.
“Mynshem snem, ka Shillong kala ieng kum kawei na ki jaka ba biang tam haba pynlong ia ka lympung, da ka jinglah ban pyniaid beit iaid ryntih bad ka jingtuid ki riew ieid phutbol. Mynta ka kynti, ngi la pynkhreh ba kan long kaba kham heh shuh shuh, khamtam da ka jingnang bun ki kynhun ialehkai ka Jylla kiba la rung ialehkai ha ka lympung” ula ong.
Ka Shillong kan ioh pynlong ia phra tylli ki jingialehkai, kynthup kawei ka quarterfinal bad ka semifinal, ha JN Sports Complex, ka ban long hapdeng ka 23 tarik Naitung haduh 23 tarik Nailar. Ka trophy road show kan leit ruh sha Nongstoin bad Tura ban ai ka lad ia ki riewieid phutbol ka Jylla ba kin ioh peit marjan ia ka trophy kaba don ia ki khana jong ka lympung.
Ka jingiakhun sdang jong kane ka lympung kan long hapdeng ka Emami East Bengal FC pyrshah ia ka South United FC na Bengaluru jong ka Group A ka ban long ha Vivekananda Yuba Bharati Krirangan, Kolkata.
Kyntur ka Jylla ban tei ia ki madan ialehkai kiba paka
Haba ban jur ia ka jingkut jingmut ka Sorkar ban pynroi ia ka kam ialehkai, u Myntri Rangbah ula iathuh ba kumba 70% na ki madan ialehkai ba don mynta ha Jylla ki dei kiba dang shna ha kine ki hynniew snem bala leit noh, kaba la kyrshan da ka jingkynshew pisa ba kot T.2000 klur.
Ki project ba kham heh ki kynthup ia ka jingkyntiew kyrdan ia ka JN Sports Comples, ka jingshna ia ka Mawdiangdiang bad ka PA Sangma Sports Complex, bad ka jingshna ia ka Football Stadium ba 40,000 tylli ki jaka shong ha Mawkhanu-ka ban long kawei na ki stadium ba hehduh ha dewbah Asia.
“Ngi kwah ba ka Shillong kan ioh ia ka jingithuh kum ka Football Capital ha India” ong u Conrad haba bynrap ba man ki District ka Jylla kin sa ioh noh iala ki jong ki Synthetis Athletics Track.
U Myntri kam ialehkai Bah Shakliar Warjri haba bynrap, ula pynpaw ia ka jingangnud jong ka Jylla ban pynmih ia ki nong ialehkai Olympics na Jylla “ Ngim kut tang ha ka jingtei ia ki stadium, ngi plie ka lad ia ki nongshongshnong ba kin beh iala ka jong ka lawei” ula ong.
U Bah Warjri ula pynbna ruh ia ka grant ba T.39.17 klur bala mang sha ki 26 tylli ki Sports Association na ka bynta ba kin pynkhreh ia ka National Games 2027, da ka thong ba kin wanrah ia 50 tylli ki medal.
Iaroh ki shipai ia ka jingkyrshan ka Jylla
Ki Shipai ka Ri India, kiba pyniaid ia ka Durand Cup, kila ai ka jingiaroh ia ka Sorkar Meghalaya namar ka jingai ia ki jingkyr shan ban pynbit pynbiang ia ki jingdonkam baroh kynthup ki madan bad ki jaka sah-kynthup ka rai ban pynbiang ia ki jing donkam ki kynhun ialehkai bar ri khlem kano kano ka jingsiew.
“Ka jingwanrah biang ia ka Durand Cup sha Shillong kaba wan jia namar ka Sorkar Meghalaya kala ai ia ka jingkyrshan naduh ka mynsiem” ong u Lieutenant General Sanjay Malik. “Ka trophy roadshow khlem pep kan ai mynsiem ia ki pateng ba mynta jong ki nongialehkai phutbol”.
Ka Durand Cup kaba long nyngkong eh ha u snem 1888 ha Shimla, ka dei kaba la wanrah nyngkong eh da u Sir Mortimer Durang, u Foreign Secretary ka British India. Nyngkong eh kane ka lympung ka dei kaba pynialehkai hapdeng ki shipai British bad ki India Regiment hynrei suki suki kala kylla long kum ka lympung ialehkai ba paw ka Ri, kaba khring ia ki club bapher bapher na kylleng ka Ri.
