Shillong, Nailar 22 : Ka jingduwai jong ki riewieid phutbol ka Jylla Meghalaya ban iohi ia ka North East Derby ka Durand Cup 2024 semi-final ha Shillong, kala urlong mynta da ka rai jong ki bor pyniaid ban rah noh ia kane ka jingiakhun na Kolkata sha Shillong.
Ka Shillong Lajong kan iakhun pyrshah ia ka North East United Football Club (NEUFC) ha kane ka North East Derby, ka ban long ha ka 26 tarik Nailar ha JN Stadium, Polo.
Kine baroh artylli ki kynhun kin iaknieh ha ka sien ba nyngkong eh ban ioh rung sha ka phainal jong kane ka lympung ialehkai kaba la rim tam bad ba hehduh ha India.
Ka Shillong Lajong kala rung sha ka semi phainal da ka jinglah ban pynliem ia ka kynhun ramhah ka Kolkata-ka East Bengal da 2-1 kol ha ka jingiakhun quarter final ba long hynnin ka sngi Balang ha JN Stadium, Polo.
Kumjuh ruh ka NEUFC kala rung sha ka semi phainal da ka jinglah ban pynliem ia ka Indian Army da 2-0 kol ha ka jingiakhun kaba la long ha SAI Staidum ha Kokrajhar, Assam.
Kat kum ka jingpynbna ka Durand Cup Organising Committee la ong “Ka rai ban wanrah ia kane ka jingkylla ka dei kaba la shim halor ka result jong ka jingiakhun quarter final ba long hynin ka sngi. Baroh artylli ki jingiakhun (quarter final) kila sakhi iaka jingialehbha na ka NEUFC bad ka Shillong Lajong, kaba ka jingjop jong u kala nang pynshongshit bad pynrhem ia I nongkyrshan ha ka thain”.
“Haba jubab ia ki jingkyrpad na ki nongkyrshan jong kine ki artylli ki kynhun bad haba ithuh ia ka jinglong kongsan jong ka madan ialehkai (Shillong) kum ka jaka ba khlain bha ki jingkyrshan jong kine ki club, ngi la rai ban pynkynriah ia ka jingiakhun semi-final hapdeng ka NEUFC pyrshah ia ka Shillong Lajong FC bad buh tarik ha ka 26 Nailar” kala bynrap.
Kala ong ba kane ka sienjam ka dei kaba la shim ban pynthikna ba ki nongkyrshan, kiba dei ka mynsiem bad u dohnud jong ka lympung ialehkai, kin mad ia ki jingshongshit jong ka jingiakhun kaba itynnad bha ha ka jaka kaba kine baroh ar kynhun kila suhthied bha ha ka jingialehkai phutbol.
“Ngi ngeit ba kane ka jingpynkylla kan nang pynshongshit bad ailad ia ki kynhun ba kin ialehkai hapdeng ki paid nongkyr shan kaba ki dei ban ioh, katba ki dag iakhun ban ioh jaka ha ka phainal” kala ong.
Kala ong pat, lada ka Shillong Lajong ka jop ia kane ka jingiakhun semi-final, ka jingiakhun jong ka final kan long ha Kolkata.
