Nongstoin, K’lyngkot 04 : Kawei ka Longiing na Sangriang, kala duh noh iala ka jong ka Iing, kaba la pluh kynsan kynsan ha ka por ba kane ka Longiing ka dang leit sha ka jingia bam khawai Khristmas hapoh ka Shnong.
Kane ka Longiing ka dei jong ka Kong Bisida Marshra. Kane ka jingpluh kala jia ha ka 27 tarik Nohprah ha ka por 12 baje shiteng sngi.
La suba jur ba ka jingpluh ka lah ban dei na ka jingthut ha ka bording elektrik hynrei donbok ba ha kane ka por ba jia, ym shym la don mano mano ruh ha Iing.
Na ka liang ka seng Hynniewtrep Youth Council-West Khasi Hills bad Nongstoin Circle, hynne ka sngi, kila leit ban ai jingia rap ia kane ka Longiing ba kynthup ia ki tin iing, u khlaw bad kiwei kiwei.
