Dorbar KHADC | Ther tyngeh ka Liang Pyrshah ia ka EC ka VPP ba ai showcause notice ia ka Ophisar

Na ka jingsam notice sha ki dukan ban siew khajna Professional Tax

Shillong, Risaw 22 : Ka Liang Pyrshah ha Khasi Hills Autonomous District Council (KHADC) kala thalain tyngeh ia ka Executive Committee ka Voice of the People Party (VPP) namar ka jingkynnoh pynjah burom ia ka Ophis da kaba pynlong paidbah ia ka showcause notice bala ai sha ka halor ka kam siew khajna Professional Tax.

Haba iashimbynta ha ka zero hour notice bala wanrah da u MDC ka Mawshynrut Bah S Rashir, u Nongialam ka Liang Pyrshah Bah Titosstarwell Chyne ula pynpaw ia ka jingkyndit bad jingsngewkhia halor ka jingjia ba dang shen ha kaba ka EC kala ai showcause notice ia ka Superintendent of Professional Tax bad pynlong kam paidbah.

U Bah Titos ula buh jingkylli la kane ka notice bala ai sha ka Superintendent of Professional Tax ka long beain? Ula pan jingtip ruh ba haduh katno sien u Executive Member (EM) ka Taxation u donkam ban ai jing mynjur ia kum kine ki notice bad hapoh ka rule aiu ba la ai showcause notice pyrshah ia ka Superintendent.

U Bah Titos ula pynpaw ia ka jingsngewkhia ba ki kam jong ka EC kala wanrah ia ka jingsyier jingtieng hapdeng ki Ophisar, kaba pynlong ia ki ban artatien ha ka jingtreikam.

“Lada kane ka dei ka rukom treikam jong ka EC ba mynta, hato ngin dang ioh ia ka jingsngewskhem jong ki Ophisar ban trei ia ka kam. Hato ki Ophisar kin treikam da ka jingtieng” ula buh jingkylli.

Ula maham ruh ba ka jingpynbna paidbah ia ki kot ki sla ba dei tang jong ka Ophis ka lah ban lam sha ka jing lait tuh sha ki lad pathai khubor wat ia ki file bad ki file notings.

U Bah Titos ula kynnoh ba ki jingleh ka EC kala mih namar ki jingkynnoh ha ki social media bad ka long kaba kloi ban pynlong langknia ia ka Ophis tang namar kine ki jingkynnoh.

Ka MDC ka NPP na Nongshken Kong Grace Mary Kharpuri, kala pynrem ruh ia ka EC ba ka ai showcause notice sha ka Superintendent of professional tax bad pynbna paidbah ia ka.

Ka kong Grace kala ong ba kane ka dei ka bym pat ju jia satia ha ka histori jong ka KHADC ba ka dei ka jing pynjah burom ia ka Ophisar.

Kane ka MDC kala batai ba ka jingai notice ka dei shibynta na ka rukom treikam bad kam mut eh ba ki nongkhaii kin hap ban siew ia ka professional tax.

Kala buh jingkylli ruh ia ka jingkam u Chief Executive Member (CEM) ba ia kane ka jingsam notice sha ki nongkhaii la leh khlem ka jingtip ka EC, haba kdew ba ka KHADC ka don ia u caretaker CEM ha katei ka por. Kala pynksan ba lada dei ba kam don ka EC, kala dei ban don ka jingsynshar u Lat ka Jylla.

“Haba ki Ophisar ki trei iala ka kam, phim lah ban pynjah burom ia ki. Mano ban pynthikna ia ka jingshngain jong ki haba ki don ha ka kam” kala buh jingkylli.

Haba jubab u CEM Bah Winston Tony Lyngdoh ula pynshai b aula ong ha ki lad pathai khubor ba ka jingsam ia ki notice ban siew professional tax la leh khlem ka jingtip jong ka EC.

Ula iathuh ba ka EC kala rai ba kan ai showcause notice lada shem ba ki nongtrei ne Ophisar ki donkti ha ka jingsam ia ki notice khlem ka jingtip jong ka. Ula kam ba ka EC ka khlem jer kyrteng ia kino kino ki Ophisar haba kren sha ki lad pathai khubor hynrei, ka kyrteng jong ka Ophisar kala lait tuh sha ki social media.

Halor ka jingkynnoh ba ka EC kala pynlong ia kane ka Ophisar kum ka langknia, u CEM ula ong ba ka dei ka kamram jong ka EC bad kum ki MDC ban kyrshan iala ki Ophisar bad kim don satia ia kano kano ka jingmut ban pynlong langknia iano iano ruh.

Ula kdew ia ka rule 27-28 jong ka AD Rules, 1951, kaba ai ka bor ia u ban thung ia ka jingtohkit lane ban ai ia ka showcause notice. Ula kyntu ia ki Dkhot ka Iingdorbar ba kin ailad ia ka EC ba kan shong bishar ia ka jubab jong ka Ophisar bad kular ba kin sa leh ia kaba donkam lada donkam ban leh.

Shuwa kane, u Executive Member (EM) ka Taxation Seibor Warbah ula ong ba ka rai jong u CEM ban pan jing pynshai na ka Ophis ka dei kaba leh da ka jingthmu ban pynbeit ryntih bad weng ia ka jingsngewthuh bakla na ka jingmut jingpyrkhat u paidbah.

U Bah Warbah ula batai ba wat hapdeng ka hukum ban pynsangeh ia ka jingai notice sha ki nongbuh dukan barit baria, ka jingsam ia ka notice ka dang iaid, kaba pynbor ia ka EC ba kan leh eiei.

“Ngin ym ailad ia kane, ngin sa pynbeit ia ka. Ngi wan hangne ym na ka bynta ka jingmyntoi ialade hynrei ban pynbeit ryntih ia ka jingtreikam ka KHADC” ula ong.