Shillong, Naiwieng 20 : U Chief Executive Member (CEM) barim bad Nongialam ka Liang Pyrshah ka Khasi Hills Autonomous District Council (KHADC) Bah Titosstarwell Chyne ha ka sngi Palei, ula pynsngew ia ka jingdonkam ba kyrkieh ia ka kawei ka kynhun jong ki Autonomous District Council (ADC) na ka bynta ban tynruh ia ki jingpynkylla kiba don jingmut ia ka Sixth Schedule.
Haba kren ha ka national seminar bala pynlong da ka All Bodo Students Union (ABSU) ha New Delhi, ula pynpaw ia ka jingsngewsih halor ka jingpynslem ban pyntreikam ia ki jingkular bala ai da u Myntri kam pohiing ka ri la palat shisnem.
“Ngi la iai bteng ban buddien ia ka kam ban pynkylla ia ka Sixth Schedule. La palat shisnem kala iaid naduh ba ngi iakynduh ia u Myntri kam Pohiing, ha kaba la pynpaw ia ka Special Committee la ai ruh ka jingkular ba yn sa khot iakren shuh shuh ia ki nongialam ki Autonomous District Council. Kine ki jingkular kila ai jingkyrmen ia ki Council jong ngi, hynrei ka jingbym iohi ia u soh, kala pynsngewkhia bad pynsngew bynniaw bha. Na kata ka daw kane ka seminar ha Delhi ka long kongsan bha ia ngi baroh. Ka phah ia ka khubor ba ki ADC jong ka thain Shatei Lam Mihngi ki long kiba iatylli haba iadei bad ki jingdawa jong ki kat kum ka riti synshar” ong u Bah Titos.
Ula bynrap “Ka KHADC ka ieng ryngkat bad ka jingdawa bala iakren hangne. Ka jingkyrshan jong ngi ka long ia ka jingpynkylla kaba don jingmut bad ki council kiba khlain. Don ki khep ba ki mih ki jingsngew ba ki thain riewlum ki jngai na ki bor shim rai ka Sorkar Pdeng. Kawei ka rynsan ia baroh ki council kan iarap ban lah leh eiei halor kane ka jingsngew bad ban rah iakren ia ka jingdawa jong ngi ha ka rukom kaba dei hakhmat ka Sorkar Pdeng”.
Kane ka seminar kala wan rah lang ia ki ADC jong ki riewlum, ki riewshemphang ha ka riti synshar ka ri, ki MP bad ki Sengbhalang na kylleng ki jylla ka thain Shatei Lam Mihngi, ba kin buh ia kawei ka jing kyrpad sha ka Sorkar Pdeng hashuwa ka Dorbar Tlang jong ka Parliament.
Haba ai jingkren, u President ka ABSU Dipen Boro ula ong “Kane ka seminar ka wanrah lang ia ki council jong ki riewlum, ki kynhun ba iakhih bad ki nongialam kiba la iaid ia bun ki lynti ban ialeh ha kaban ioh jingiada kat kum ka riti synshar bad ka hok ha ka sain hima sima. Ka jingpynkylla ka iadei bad ka Article 280 bad ka Sixth Schedule ka rai kumno ba ki Council jong ngi ki ioh pisa, ki pyntreikam ia ki bor bad pyrkhat ia ki kam pynroi…Ka Bodo Accord u snem 2020 ka kular ia ka Council kaba khlain bad ba khmih ia bun ki sobjek. Ka sienjam ba mynta ka hap ban wan lyngba ka Parliament”.
U Nongiasaid ain ka Supreme Court Vijay Hansaria ula maham “Ka Bodo Accord kam dei ban shu kut tang ha ki kot ban shu pyni paidbah khlem da don ki kam kiba paw halor ki jingkular bala pruid dak ha ka. Ka jingshaniah kala don ha kane ka soskular bad kane ka jingshaniah ka donkam ban iohi ia u soh ha madan”.
U CEM barim ka BTR bad u nongsoi ia ka Bodo Accord Pramod Boro ula pynkynmaw da kaba ong “La jan 40 snem, ki paid Bodo bad kiwei ki riewlum ha NE kila iaid ha ka jingiakhih kaba bun snem bha….Ia ka Accord ym lah ban shu khein tang kum ki jingkular ha ka por ialap elekshon bad kut noh hadien ka elekshon. Dei ban burom ia ka namar ka dei ka jingkular bala ai sha ki nongshongshnong”.
Ka seminar kala kut da ka jingkyrpad lang sha ka Sorkar Pdeng bad sha ka Sorkar Assam ba kin pyntreikam noh ia ki kyndon ba dang sahteng jong ka Bodo Accord, ban wanrah ia ka Constitutional Amendment ha Parliament bad ban buh ia ki kyndon kiban pynkhlain ia ka pla tyngka bad ka rukom treikam jong ki 10 tylli ki Sixth Schedule Council.
Ki kynhun kin sa ialum paidbah bad iashong kyllain mungor ruh ha Jantar Mantar ha ka 21 tarik Naiwieng ban pynbteng ia ka jingdawa.
 barim bad Nongialam ka Liang Pyrshah ka Khasi Hills Autonomous District Council (KHADC) Bah Titosstarwell Chyne ha ka sngi Palei, ula pynsngew ia ka jingdonkam ba kyrkieh ia ka kawei ka kynhun jong ki Autonomous District Council (ADC) na ka bynta ban tynruh ia ki jingpynkylla kiba don jingmut ia ka Sixth Schedule.){kind=link}