Delhi Nailur 30: U Nongialam ka Khasi Author’s Society (KAS) Bah Kynpham Sing Syiem ula ong, ba donkam ban pynlong noh da ka ‘Lehlang’ ne ka Mass Movement ban lah pynurlong ia ka jingdawa ban pynrung noh ia ka Ktien Khasi haka Khyrnit ba Phra jong ka riti synshar ka ri.
U Bah Kynpham ula ong, ka jingpynlong ka KAS ia ka National Seminar bad ka jingialang paidbah, kaba kongsan eh, ka long ban pynsngewthuh bad ban pynsaphriang ia ka jingdawa na ka sorkar India ban pynrung noh ia ka ktien Khasi haka Khyrnit kaba Phra bad kane kadei kawei na kita ki mawjam bad kaba khatduh kan poi sha ka ‘Lehlang’ ne ka Mass Movement.
“Kane kadei tang ka jingsdang bad khlem ka Lehlang kaba iadonkti lang da baroh, naduh ki nongsynshar ha ki kyrdan bapher bapher, ki sengbhalang, ki nongthoh bad ki paidbah jong ka ri baroh kawei. Lada ngim don iaka Mass Movement, tang da ka KAS ngin ym lah ban jop ia ka thong” ong u Bah Kynpham.
Ula ong, kane kadei ka sien kaba nyngkongeh ba ka seng u Khasi kan wan pynlong ia ka jingiakhih ha Jantar Mantar kaba dei ka nongbah jongka ri bad jingwan ki lad pathai khubor na kylleng ka ri kan pynsaphriang ia ka khubor ha ka Ri bad ban pynsawa jam ia ka sur jong ka jingdawa.
“Ka jingwan iashimbynta lang ki nongialam jongki seng saiñ pyrthei ki nongialam sengbhalang na kylleng ki jaka kala sdang pyniatylli ia ka jaidbynriew” ong u Bah Kynpham.
Ula ong ba hadien kane ka jingiakhih, kila dep pynkhreh ia ki kot ki sla ban aiti sha ka sorkar pdeng kaba don ia ki jingpynshai ban pyni ia ki kyndon kiba la pynlong ia ka ktien Khasi ba kan rung ha ka Khyrnit kaba Phra jong ka riti synshar ka ri.
 Bah Kynpham Sing Syiem ula ong, ba donkam ban pynlong noh da ka ‘Lehlang’ ne ka Mass Movement ban lah pynurlong ia ka jingdawa ban pynrung noh ia ka Ktien Khasi haka Khyrnit ba Phra jong ka riti synshar ka ri.){kind=link}