Shillong, Iaiong 05: Ka Leisha Agarwal na ka skul St. Margaret’s Higher Secondary School Shillong kaba la ioh ia ka kyrdan kaba nyngkong ha ka eksam SSLC 2025, kala ong ba ka long kaba donkam ban iai neh ha ka jingminot bad jingtrei shitom, haba don don ia ka thong.
Ka Leisha Agarwal ryngkat bad ka Avila Kathrene P Lyngdoh na ka North Liberty Higher Secondary School, Jowai, kila ïoh bat lang ïa ka kyrdan kaba nyngkong ha kane ka eksam kaba la pynlong da ka Meghalaya Board of School Education (MBOSE) da kaba ïoh lang mar 582 marks.
“Nga sngewkmen shibun ba nga la ioh ia ka kyrdan ba nyngkong ha ka MBOSE Merit list 2025. Nga sngew kyndit haba nga peit ia la ka jong ka Result namar nga la ioh 97%” la ong ka Leisha.
Kala ong ba naduh ba ka rung sha ka Class X, ka ju mutdur bad phohsniew bad ka kwah shisha ban wan shakhmat eh haka eksamin SSLC. “Mynta ka sngi kata ka jingangnud kala urlong” kala ong.
“Nga kwah ban ai khublei baroh ia ki nonghikai naduh ki nonghikai hapoh skul bad tuition jong nga namar khlem ka jingkyrshan jong ki ngan nym lah ban wan shakhmat ha kane ka eksamin. Nga kwah ban ai khublei ia baroh kiba la don lang ha ka jingiaid lynti jong nga” kala ong.
