Shillong, K’lyngkot 27: Ki Bank bapher bapher kiba ai jingshakri ha ka Jylla Meghalaya ki la sangeh ka jingtreikam ka jongki hynne ka sngi Baar, namar ki nongtrei bad ki ophisar kila iashimbynta ha ka jingiakhih kaba la pynlong ha ka Ri baroh kawei ban dawa ba dei ban treikam tang 5 sngi ha ka shi taiew.
Ka United Forum of Bank Unions (UFBU) kala ialam ia kane ka jingiakhih, ha kaba u Convenor Bah Wandaplang Mawroh ula ong “Ngi lah iai dawa ban treikam tang 5 sngi ha ka shi taiew bad kala dei ka por ba ka sorkar kadei ban shimkhia shisha noh ia ka jingdawa ka jong ngi”.
Kane ka jingiakhih kala ktah ia baroh naduh ki kam shimet, ki kam bar ri, ki thain nyngkong bad ki cooperative bank, kaba thmu ban dei ban ai shuti ha ka Sngi Saitjain bad ka jingkyntiew da 40 minit ia ka por treikam naduh ka sngi Nyngkong haduh sngi Thohdieng.
U Bah Mawroh ula banjur ba kane ka jingiakhih kam dei da ka jingthmu ban pynthud ia ki paitbah hynrei ban pynpaw ia ka jingdonkam ban pynbha ia ka rukom treikam treijam.
“Ka jingdawa ka jong ngi kam dei pyrshah ia ki paitbah ne Customer hynrei na ka bynta ka rukom treikam kaba iahap kum ki para briew hapoh ki Bank” ula ong.
Kumba 8 lak ngut ki nongtrei bad ki ophisar ha kylleng kane ka Jylla bad ka Ri kila iashimbynta ha kane ka jingiakhih, hynrei ki lad treikam jong ki Bank kum ki ATM, Internet Banking bad Mobile Banking kidei kiba la khmih lynti ba kin bteng ban treikam.
