Shillong, Rymphang 17 : U Symbud Myntri Rangbah ba khmih ia ka kam Pohiing (Police) Bah Prestone Tynsong ula pyntip ha Iingdorbar Thaw Ain ha ka sngi Ba-ar, ba haduh 658 ngut ki nong Bangladesh kila shah bat bad shah pynngat ha ki kyndon ain hapoh Jylla naduh u snem 2021 bad 194 ngut la pynphai pat hadien ba ki pyndep ia ka por pynsajia.
Haba jubab ia ka call-attention notice bala wanrah da u MLA ka VPP na Mawryngkneng Bah Heaving Stone Kharpran, u Bah Prestone ula pyntip ba ka Sorkar kala thaw ia ki lad iakhun mynder ri kaba bniah bad ba bun bynta khnang ban tehlakam ia ka jingwan rung beain.
U iathuh ba ka Sorkar kala pynieng haduh 18 tylli ki anti-infiltration check post, gate bad ki land custom station mynta kila treikam ha ki jaka ba kongsan ha kylleng ki jaka khappud Inter-State bad Indo-Bangladesh.
“Ia kine la kyrshan pat da ki Anti-Infiltration Special Squads kiba treikam ha baroh ki District, kiba ju pynlong ia ka jingkhynra mynder ri, talasa kali ba kynsan kynsa ha ki surok (NAKA) bad jingiaid pahara ha ki jaka ba suba don ki mynder ri, ha ryngkat ka jingiatreilang bad ka Tnad Labour, Village Defence Party bad ki bor shnong” ong u Bah Prestone ha Iingdorbar.
Ka Sorkar kala thung ruh ia 11 tylli ki District Task Force ban bat bad pynphai ia ki mynder ri kiba wan rung beain.
“Kine ki sienjam kila lam sha ka jingioh bat ia bun ngut bad ka jingtreikam kaba sei ia u soh” ula ong haba pyntip “Naduh u 2021 haduh ka 03/02/2026, haduh 658 ngut ki nong Bangladesh lah ioh ban bat ha Jylla bad la pynngat ia ki hapoh ki kyndon ain ba iahap. Ha kane ka juh ka por, haduh 194 ngut ki nong Bangladesh lah pynphai pat hadien ba kila pyndet ia ka jingpynsajia bad hadien ba kila ioh ia ka Travel Permit na ka Bangladesh Embassy”.
U Bah Prestone ula bynrap ba ka Sorkar kala thung ia ka State-Level Committee ba kan peitngor ia ka jingpynithuh bad jingpynphai ia ki mynder ri kiba sah tam ia ka por ba ki dei ban sah.
Ka Meghalaya Resident Safety and Security Act, 2016, mynta kala treikam ha kiba bun ki jaka jong ka East Khasi Hills, haba pyntreikam ruh ia ki kyndon jong ka Immigration and Foreigners Act, 2025, ka Bharatiya Nyaya Sanhita bad ki kyndon ka Ministry of Home Affairs.
“Ka Sorkar ka kyrpad ia baroh ki kynhun seng bad ki nongshongshnong ba kin iatreilang bad ki bor Sorkar bad ban shah ia ka jingpynshisha ban sa leh lyngba ki lynti ka ain” ula ong haba ban jur ia ka jingdonkam ban iada ia ki nong India ba pura bad pynthikna ba ki mynder ri ba buhai shnong beain kin ngat ha ka jingpynsajia ba tyngeh kat kum ka ain.
 Bah Prestone Tynsong ula pyntip ha Iingdorbar Thaw Ain ha ka sngi Ba-ar, ba haduh 658 ngut ki nong Bangladesh kila shah bat bad shah pynngat ha ki kyndon ain hapoh Jylla naduh u snem 2021 bad 194 ngut la pynphai pat hadien ba ki pyndep ia ka por pynsajia.){kind=link}