Shillong Naitung 24: Ka Sorkar Jylla kala pyndep ban pynkynriah ia ki nongshong die madan sha ka mala kaba nyngkong jong ka MUDA Parking Lot, Khyndailad, Shillong.
Haba pynbna ia kane hynne ka sngi Palei, u Nongaiktien ka Sorkar Jylla bad Myntri Sorkar Bah Paul Lyngdoh, ula ong “Da ka jingiatreilang ki bor pyniaid District bad ka tnad Urban Affairs, la pyndep ia ka jingpynkynriah ia ki nongshong die madan kiba la ioh jingithuh sha ka mala kaba nyngkong jongka MUDA Parking Lot ha Khyndailad.”
“Ka long shisha ka sngi kaban sah kynmaw ha ka histori jong ka sorkar Meghalaya, kumba phi lah tip ngi lah khmih bniah bha ia kane ka kam ha kaba iadei bad ka jingpynkynriah ia ki nongdie bad ki nongshong dukan madan ha ka thain Khyndailad” ong u Bah Paul.
“Kala shim bha ia ka por, ban ia kaba ngi lah mutdur hynrei baroh ka lah iaid beit bad ngin dap da ka jingkmen ban iohi ia ka dur kaba thymmai bad ka jingkyntiew ia ka thain Khyndailad lyngba kane ka jingpyniaid ryntih ia ka jingpynkynriah ia ki nongdie madan” ula bynrap.
U Bah Paul Lyngdoh ula pyntip ba ha ka jingpynlong ia ka jingkhmih bniah ban ithuh ia ki nongdie kiba dei hok, kila don 1,400 ngut ki nongdie madan kiba la iashimbynta. Na kitei ki nongdie ha ka jingkhmih bniah la shem ba 407 ngut kidei kiba dei hok ban ioh ia ka Certificates of Vending (CoV), ha kaba 311 ngut ki lah dep ban shim ia ki syrnod ne certificate.
Ka jingai ia ki jaka shong die jingdie kadei kaba la leh da ka lynti kaba shai kdar da kaba khalai nusib ban pynthikna ba baroh ki nongdie kiba la ioh jingithuh kin ioh ia la ka kabu.
“Mynta ban plie lad ia ka jingpynkynriah, la tei ia ki 365 tylli ki jaka shong die jingdie ha kaba 282 tylli la dep ban aiti bad ia kitei mynta la pyndonkam ha kaban buh ia ki dukan bapher lyngba ka jingpynkhalai nusib kaba long shai kdar” ula ong bad ka bynrap ba “Katei ka jingpynkhalai nusib kadei thik tang na ka bynta kito ki nongdie kiba la ioh jingithuh bad ka jingpynkhalai nusib ka long thik na ka bynta ban ai jaka khnang ba yn ym don mano mano ruh kiba lah ban ong ba kala don ka jingshah liang ha ka rukom ai ia ka jaka ban die jingdie la ka long hakhmat ne shadien. Baroh ki lah ioh ia ka mar katjuh ia ka kabu ban ioh ia ka lad ban ioh ia ka jaka da kaba pynkhalai nusib”.
“Ngin sa bynta ia ki kam ki jong ngi ha ka lynti kaba biang ha kaba ngin buh hakhmat shwa ia ka jaka kaba kongsan tam. Kumta ha katei ka skhim ka jong ngi, ngi buh hakhmat eh ia ka jingpynkynriah ia kaba ngi lah lah ban leh ha ka lynti kaba jop” ong u Myntri Sorkar bad ka pynkynmaw ba kane ka jingleh kadei kaba la ioh ia ka jingkyrshan bad ka jingiatreilang na ki nongdie madan.
“Ha kaba nyngkong kala don ka jingpyneh wat ia ka jingpyrkhat ban pynkynriah. Mynin phi lah ban iohi ia ka jingieng lain ki nongdie madan ban ioh ia ki jaka die jingdie, kumta kadei ka jingkylla kaba khraw na kaba ong em, sha kaba ong, nga dei ban ioh nyngkong” ula ong.
Nalor katei, u Myntri ula ong ba ka sorkar jylla kala ai ruh ia ka jingsiew kaba shisien kaba T.10,000 bad ka jingsiew kaba man la ka bnai kaba T. 2,000 na ka bynta 5 bnai, ban khyllie ia ka bai duh ha ka khaii pateng. Ula pynthikna ruh ba ia baroh ki jingdonkam yn sa pynbiang na ka bynta ki nongdie madan kiba la shah pynkynriah.
Ha kawei pat ka liang, u Bah Paul ula ong ba ka sorkar jylla kam pat ioh satia ia kano kano ka jingtip halor ka jingshah knieh noh ki CoV.
“Hynrei haba phi peit ia jingtip bad ia ki jingdon, ngi don sa tang katto katne ki jaka shong die jingdie bad ngin pynthikna ba baroh kin ioh ia ka jingshah shimkhia kaba mar kumjuh bad kaba iaid ryngkat bad ka nongrim ba ka ain kadei ban synshar” ula ong.
