SHILLONG, Naitung 20: U Chairman-cum-Managing Director ka Meghalaya Energy Corporation Limited (MeECL) Sanjay Goyal hynne ka sngi Palei, ula pyntip ba ka MeECL kam don shuh ia kano kano ka jingkit ram kaba dei ban siew sha ki kompani pynmih bording elektrik.
Une u Heh Sorkar ula pyntip ruh ba ka pisa kaba ka MeECL ka siew sha ki kompani mynta kadei kaba siew man la ka sngi.
“Ka Pisa ba ngi siew mynta sha ki kompani ka dei kaba siew manla ka sngi, kumta ngim don shuh ia kano kano ka jingshah ram, kaba ka ju don bad ki kompani pynmih bording khamtam bad ki kompani ka sorkar pdeng kaba ngi ju shim iaka bording” ong u Goyal.
Hynrei ula pynpaw pat “ lait noh ia kawei ka Kompani NTPC kaba dang don hapdeng ka jingiakhun mukotduma duma hynrei ia kane ruh ngi dang pyrshang ban wad iaki lad ki lynti ban pynbeit noh ia kane da ka jingiakren ia sngewthuh jingmut” ong u Goyal.
Ula ong ba ka jingiakren ka dang iaid shakhmat bad ha ki sngi ban wan la kyrmen skhem ban lah ban pynbeit noh shen ia katei ka kam.
U Goyal ula pyntip ruh ba ka MeECL ka siew ia baroh ki jingsiew ha ka por kaba biang ia baroh ki kompani bad ka sorkar jylla ka don ha ka khyllipmat ba ka lah ban shim ia ka pisa namar ka jingsiew thikna ia ka jingsiew.
U Goyal ula ong ka MeECL ka pyrshang ban ym py sah slem ia ka ram, ne pybsahkut ia kano kano ka jingsiew ia ki kompani ka sorkar pdeng ban pynthikna ba ka jingtreikam ka MeECL kan long kaba iaid beit iaid ryntih.
“Lada ngi siew thikna ia ka pisa ha ka por kaba biang, ngin wan shakhmat ha kaba iadei bad ka jingbit jingbiang ia ka jingdon ia ka pisa ka tyngka bad kumjuh ia kiwei pat ki kyndon pud kaba ka sorkar pdeng ka pyniaid ia ki kam ki jam bad khmih bniah ia ka jingtreikam ka jong ngi” ong u Goyal.
Ula pyntip ruh ba ka jylla kala wan ha ka kyrdan kaba rit bha (Rank D) ha u snem ba la dep. Hynrei ka sorkar kala pyrshang ban pynbit bad pynbha ha kaba iadei bad ka jingioh kyrdan mynta u snem.
Ha kaba iadei bad ka jingkylli halor ka jingdon ka um ha Pung Umiam, u Goyal ula pyntip ba dang donkam sa 15 phut ka um ba kan don ha ka bynta katkum ka jingdonkam.
U Goyal ula iathuh ruh ba ka sorkar jylla ka dang wad iaki lad ki lynti ban pyndonkam iaka Thermal Power Projects ka jingpynmih bording lyngba u dewiong, ban iarap ha kaban weng ia ka jingeh halor kanjingduna ka bording elektrik ha jylla Meghalaya.
