Shillong, Rymphang 13: U Symbud Myntri Rangbah ka jylla ba khmih ia ka tnad PWD (Roads) Bah Prestone Tynsong hynne ka sngi Baar, ula pyntip ba la dep ban pynbeit pura iaka lynti iaid jong ka surok Pynursla Bypass.
Haba iakren bad ki nongthoh khubor u Bah Prestone Tynsong ula ong ba ka jingkynnoh ha ka Affidavit kaba la ujor sha ka Meghalaya High Court ba ka jingpyniaid iaka lynti jong ka Bypass ym pat lah ban pyndep namar ka jingpyrshah ki trai shnong ka long ka bym dei.
“Nga tharai kane ka long kaba bakla. Ia mynta namar ba ngi la pyndon bynta lang ia baroh ki khlieh nongsynshar shnong, ki nongkitkam shnong, ki trai jaka bad ia baroh bad ngi la leit ha ki jaka bad ngim shym la shim ia ka rai na ka community hall ne ka jaka, ne ngi baroh ngi la shu ia shong hynrei ngi la pynlong ia ki jingjurip ha ryngkat ka jingdonlang ki bor pyniaid shnong, SDO Civil, ADM ba khmih ia ka Revenue, nongmihkhmat na ka NHIDCL bad ki Engineers na ka PWD bad la lah ban pyndep pura iaka lynti na ka bynta ban pyniaid iaka surok ha kaba iadei bad ka Pynursla Bypass” ong u Bah Prestone.
Ula ong, ba ki trai jaka kila mynjur ia katei ka jngpyniaid ia ka lynti jong ka surok kaba thymmai kaba la leh da ka PWD bad NHIDCL bad la dep ruh ban aiti sha ka Ministry of Road Transport bad sha ka ophis treikam jong ka NHIDCL.
“Dang shen nga la leit sha Delhi bad nga la iakren bniah bha ha ka jingialang bad ki ophisar jong kitei ki tnad bad nga ngeit skhem ba shen ngin sa lah ban ioh noh ia ka bhah tyngka” ula ong.
