Shillong, Jylliew 03 : U Myntri ka Tnad Revenue & Disaster Management Bah Kyrmen Shylla ha ka sngi Ba-ar, ula pyntip ba ka Sorkar kala dep lypa ban pyllait ia ka song pisa sha ki Deputy Commissioner ba kin ai jingiarap ia ki lanot ba shah ktah ha ka jinglynshop ki bor ka mariang.
Haba kren sha ki nongthoh khubor, u Bah Kyrmen ula pyntip ba ka song pisa ba T.4.59 klur kala don bad ka Deputy Commissioner ka East Khasi Hills, West Khasi Hills – T 1.22 klur, South West Khasi Hills – T.60.71 lak, Ri Bhoi – T 1.21 klur, West Jaintia Hills – T. 75.37 lak, East Jaintia Hills – T. 4.82 lak, East Garo Hills – T.1 klur, West Garo Hills – T.1.85 klur, North Garo Hills – T.91 lak, South Garo Hills – T. 1.18 klur, South West Garo Hills – T. 1.46 klur, Eastern West Khasi HIlls – T. 4.47 klur.
Ula pyntip ba hynriew ngut ki briew kila iap na ki jingjia kiba wan jia na ka jingther jong u slap.
“Ngi la pyllait ia ka song jingiarap ba T. 4 lak marwei sha ki bahaiing jong ki san ngut ki lanot haduh mynta” bynrap u Bah Kyrmen.
Haba kylli, u Myntri ula ong ba haba kren ia u slap, ka dei ka jingkyrkhu namar ka um ka dei ka jingim.
Hynrei, ka jingktah jong u ka dei kaei kaei kaba ka Sorkar ka hap ban khmih ban pynthikna ba ki nongshongshnong ki ioh ia ki jingiada.
Ula ban jur ia ka jingdonkam ba ki paidbah kin iatreilang bad ai lem ka jingiarap ha ka ban iada ia ki mynsiem briew ha ka por ba don ka jinglynshop ki bor ka mariang.
Ha kajuh ka por, u Myntri ula kyntu ia ki nongwan shangkai sha Meghalaya ba kin phikir bha ialade bad ban tip ia ka jinglong jingman ha ka Jylla khamtam ha ka aiom slap.
