Shillong, Iaiong 21: U Justice (Retd) B.P Katakey uba khmih iaka Inquiry Committee bala thung ban ai jingmut ia ka sorkar jylla halor ka kam dewiong, ula pyntip hynne ka sngi Thohdieng ba haduh mynta 6 lak MT u dewiong bala buh jingkhein, la dep ban lilam daka CIL bad ka jingpynkhreh kala iaid shakhmat ban pynkloi ia ka jinglilam sa ia 12 lak MT u dewiong ha u bnai Jymmang.
U Justice (Retd) B.P Katakey ula pyntip ba ula dep ban shim jingkhein ia ka jingdon u dewiong bala pynkit sha ki depot bala ithuh da ka sorkar bad une u dewiong u dei shibynta na u dewiong bala buh jingkhein uba long kumba 14 lak ton eiei.
“Katkum ka por bala buh da ka ïing kashari Meghalaya High Court, hashuwa ban kut u bnai Jymmang ka sorkar kadei ban dep lilam 12 lak MT u dewiong bad ia mynta haduh 6 lak MT u dewiong la dep ban lilam daka CIL katkum ka jingbthah ka ïing bishar ba khliehduh ka ri India ka Supreme Court” ula ong.
“Te, ka don ka jingslem kumba 30 sngi bad haduh mynta nga dang pyrshang ban pynsted ia ka kam khnang ba hapoh u bnai Jymmang, yn lah ban die noh sa ia 12 lak MT u dewiong” ula bynrap.
