Shillong, Iaiong 21: U Justice (Retd) B.P Katakey uba khlieh iaka Committee ban peitngor iaki kam beain haba iadei bad u dewiong, ula iathuh ba ka Committee ka dang pynkhreh ban ithuh iaki katto katne ki jaka hapoh ka jylla ban buh daki Pulit Central Armed Police Force (CAPF).
U Justice B.P Katakey ula iathuh ba dang shen ka Meghalaya High Court kala pynmih iaka hukum haba iadei bad ka jingbthah ka sorkar pdeng ban phah 10 pyrton ki Pulit CAPF naka bynta ban peitngor iaki kam beain haba iadei bad u dewiong.
Ula iathuh ba ka High Court kala bthah ruh ban thung ia uwei Pulit naka Meghalaya Police Service (MPS) bad halor kane ka Committee ka dang iakren bad ka tnat kam pohïing naka bynta kane ka kam.
Ula iathuh ruh ba hadien bala dep ban thung briew bad hadien bala ithuh iaki jaka, kum u khliehduh ka Committee un sa iakren bad ki Commandant naka bynta ban pynieng iaki Pulit CAPF bad lada don kaei kaei, un hap bthah iaki Pulit ban pyntip shaka Committee.
Nalor kane u Justice B.P Katakey ula iathuh ba dalade ruh u la iohi ia ka jingshalan beaiñ ia u dewiong khamtam haba iadei bad ka jingjia kylla ka Trok kit Dewiong haka 4 tarik mynta u bnai . U iathuh ba ula buh jingkylli ia ka sorkar ba balei ka jingshalan beaiñ ïa u dewïong ka dang bteng khlem jingduna.
Ula iathuh ba naka liang ka sorkar jylla ruh mar mar kala thung da u Pulit ophisar MPS jong ka kyrdan DSP ban pynlong ka jingtohkit, ha kaba la dep ban ai ïa ka kaiphod jong ka jingtohkit kaba sdang, bad mynta dang ap ïa ka kaiphod jong ka jingtohkit kaba khatduh.
