Shillong, Naitung 28 : Ka Sorkar Jylla ha ka sngi Ba-ar kala pynshai ia ki jingsngewkhia u paidbah halor ka Shillong Peak Ropeway Project, bad pynpaw ba ka project kala dep ioh lut ia baroh ki jingbit kiba donkam kat kum ki ain bad la pyntrei ia ka ha ka rukom ban iada ia ka mariang bad ki shnong ki thaw.
Ha ka kyrwoh, ka Meghalaya Ropeway Development Authority kaba don hapoh ka Tnad Tourism ka la pyntip ba ia kane ka ropeway project ba T.151 klur la pyntrei kum shibynta jong ka PM-DevINE scheme.
Ia ka jingbei tyngka la iateh bad ka New Developmant Bank kaba synniang T.80.89 klur bad ka Ministry of DoNER kaba ai T.70.11klur.
Ka jingpyntrei ia kane ka ropeway ba jrong 896 meter, ka ban don 13 tylli ki cabin ki ban shna kat kum ka European CEN standard, la buh ba kan sdang ha ka 15 tarik Risaw, 2025.
Ki Heh Ophisar ki pyntip ba ka project ka thmu ban tyrwa ia ki nongjngohkai ban jied ia ka leit ka wan ba kham biang bad ruh ban thaw ia ka lad aikam aijam bad pynduna ia ka jingdheng kali bad pynduna jingpynmih tdem ha Lum Shillong. Hadien bala pyndep, la khmih lynti ba kan dei kawei na ki ropeway kit briew ka juk ba iaid mynta hapoh ka Ri.
Ka Authority ka pynpaw ba ia kane ka project la tyrwa da ka Tnad Tourism ha ryngkat ka jingiatreilang bad ka Dorbar Pyllun ka Riat Laban, kaba la aiwai ia ka jaka ba 7,416.95 sqm hapoh ka jingiateh kular bala iasoi ha u Kyllalyngkot 2023.
Halor ka kam mariang, ka Sorkar ka iathuh ba ia ka jingbit ban pom dieng ha ka jaka ba 2.3357 hectare la ai da ka Ministry of Environment, Forest and Climate Change ha ka 24 Risaw 2024. Ia ka jaka ba bujli ban thung dieng biang lah aiti ha u Nailur 2023, bad la bud kat kum ki kyndon ka Forest Rights Act.
Ka jingbit ban pom ia 544 tylli ki dieng la dep ban ioh hadien ba la dep ban buh dak ia ki. La pyntip ruh ba kat kum ka EIA Notification 2026, ka project kam donkam satia ia ka environmental clearance.
Baroh ki NOC kiba iadei bad ka jingshngain lah dep ban ioh lut kynthup na ka Airport Authority of India ha u Iaiong 2023, ka Air Force ha u Naitung 2023 bad ki shipai ha u Nailar 2023.
Ka Sorkar kala ban jur ba ka roi ka par bad ka jingiada ia ka mariang kan iaid ryngkat ryngkat.
