Shillong, Nailur 10 : Ka sorkar jylla ka la lah ban pyniaid bha ha kaba pyntreikam ia ki projek hapoh ka Smart City Mission, bad ki kam kiba la pyndep haduh u bnai Naitung mynta u snem kala kot ia ka 77.81%.
Ia kane la pyntip da u Symbud Myntri Rangbah ka Tnad Urban Affairs Bah Sniawbhalang Dhar ha ka Iingdorbar Thaw Ain ha ka sngi Balang.
U MLA ka Nongkren ula pynpaw ia ka jingsngewkhia ba ka Sorkar kala pynleit jingmut tang ia ki jing tei jong ki jingtei ban pynlong iew (commercial complex), kaba long pyrshah ia ka jingthmu jong ka Smart City project ka ban kyntiew ia ka shong ka sah, kynthup ka pule dangle bad kiwei kiwei ki bynta.
U Bah Dhar ula kubur ba kane ka lah ban dei ka kam jong ka wat ba nyngkong hynrei ula kular ba yn sa kynthup ruh ia kiwei ki project ba kongsan ha ka wat kaba ar.
U Myntri ula pyntip ruh halor ka jingbuh ia ki Open-air gym ha kylleng ki jaka ha Shillong, kynthup ha Iingsah u Lat, Mawprem bad Laitumkhrah, kiba ki project kin kot haduh T. 5 klur.
Haba iadei bad ka Polo Commercial Complex, u Bah Sniawbha ula ong ba iakane ka complex la dep ban plie dang shen da ka Myntri pla tyngka ka Ri bad mynta ki kam kila iaid ban pyntreikam noh ia ka, da ki 109 tylli ki dukan.
U Nongialam ka Liang Pyrshah Mukul Sangma ula kylli la kala don ne em ka jingleh audit ia ka jingtei bha ia kane ka complex ha Polo, ia kaba u Myntri ula jubab ba ia kane ka kam la leh hi da ka Tnad.
U Mukul ula pynpaw ruh ia ka jingsngewkhia halor ka jingkynnoh ba sei tulop bah eh bha da u CEO ka Smart City Project, hynrei u Myntri ula pynpaw ba u donkam ia ka notice halor kane namar ba um don satia ia ka jingtip bad u.
U Myntri Rangbah Conrad K Sangma ula pynshai ba ka Sorkar haba nyngkong kala khot da ka tender ban pyntrei ia kane ka jingtei hynrei ym shym la don satia ba thep. Ka Sorkar mynta ka dang bishar la kan shu aiwai da ki mala ne da ki dukan haba aiti ia ki dukan.
“Shen ngin sa shim rai halor kane” ula ong.
