Thoh u CM sha u CM ka Assam ban wanrah ia ka Joint Action Plan
Shillong, Lber 13: U Myntri Rangbah ka Jylla Conrad K Sangma, ha ka sngi Palei, ula kam ba dei ki karkhana na ka Industrial Area jong ka Sorkar Assam kaba don ha Burnihat, kiba dei ki daw bah jong ka jingkylla ka Byrnihat kum ka sor ba jaboh tam ka lyer hapoh ka pyrthei.
Haba wanrah ia ka suo moto statement hapoh ka Iingdorbar Thaw Ain, u Myntri Rangbah ula ong ba kat kum ki jingkhein jong ka Meghalaya State Pollution Control Board (MSPCB), ka jingpynmih tdem jong ki karkhana na ka Industrial Estate ka Jylla ki dei kiba dang hapoh u pud uba biang ne kaba dang biang.
U Myntri Rangbah ula kular ba yn sa wanrah ia ka Joint Action Plan hapdeng ka Meghalaya bad Assam ban leh eiei halor ka jingjaboh jong ka lyer ha Byrnihat.
“Nga la dep thoh shithi sha u Myntri Rangbah ka Assam Himanta Biswa Sarma halor kane ka kam. Nga la kyntu ia u (Assam CM) ban don noh da ka Joint Action Plan (ban leh eiei ia kane ka kam) naba ka Byrnihat ka dei ka sor ha khappud ha kaba baroh arliang ki don ia ki karkhana” ula ong.
Watla ka Meghalaya kala shah pynpaw marwei ha ka kaiphod, u Myntri Tangbah ula ong ba ki don ki jingsngewkhia na baroh arliang khappud bad kane ka kam ka dei kaba hap ban leh eiei da baroh artylli ki Jylla haba bynrap ba kila don ki ain ban pynthikna ba ki Jylla kin hap iatreilang ban leh eiei ia kum kine ki kam.
Haba sot ia ki khubor ba iadei bad ka AQAir’s World Air Quality Report, 2024 ba ong ba ka Byrnihat haba thew ia ka PM2.5 kala kot ia ka 128.2 microgram per cubic meter (ug/m3), u Conrad ula ong “Kat kum ki jingkhein bala pynmih na ki 4 tylli ki Manual Ambient Air Quality Monitoring Station jong ka MSPCB ba don ha sor Byrnihat, ka jingpynmih ia ka PM2.5 jong u snem 2024 ka long 50.1 microgram per cubic meter (ug/m3)”.
“Nalor kata, kat kum ka jingkhein ka MSPCB naduh u Kyllalyngkot haduh u Lber (taiew ba nyngkong), 2025, ka Air Quality Index (AQI) jong ka Byrnihat la shem ba ka dang biang (satisfactory)” ula bynrap.
U Conrad ula pyntip ia ka Iingdorbar ba ka MSPCP kala pynlong ia ki jingjurip ba kynsan kynsan ia ki karkhana ha EPIP bad 13 Mer ha ka 24, 27 bad 31 tarik Kyllalyngkot 2025 bad 5 tarik Rymphang 2025. Kane ka jingjurip kala pynpaw ia ka jingpynkhein ia ki kyndon pynmih tdem bad pynih tdem ba shyrkhei bha da ki karkhana namar ka jingbym pyntreikam ia ki Pollution Control Devices ne ki kor ban pynduna ia ka jingpynmih tdem, ka jingbym treikamki kor bad ka jingbym ai jingkhein ki kor ia ka jingpynmih tdem.
Namar kata, ka MSPCP kala phah notice ban khang dam ia ki 7 tylli ki karkhana ban pynngat ha ka kuna ban siew bai pyn jaboh mariang ia ki 2 tylli ki karkhana.
U Conrad u iathuh ba hadien ka jingkhangdam ia kine ki 7 tylli ki karkhana ha Byrnihat, Meghalaya naduh ka 29 tarik Kyllalyngkot haduh 11 tarik Lber, 2025, la lap pat b aka AQI bala pynmih n aka Continous Ambient Air Quality Monitoring system (CAAQMS) bala pynieng ha ka Central Academy for State Forest Service (CASFOA) Burnihat, Assam, ka dang pynpaw ba ka AQI ka long kaba jaboh bha ha kiba bun ki sngi.
“Kane ka pyni ba ka tyllong kaba bun eh jong ka jingjaboh ka lyer lah ban kynnoh ia ki karkhana bad kiwei ki kam sha shiliang jong ka Assam” ula ong.
U Conrad ula ong ba ka Burnihat Industrial Area ha Assam, kaba don ha syndah ka sor Byrnihat, Meghalaya, ka dei kaba la ithuh kum ka Critally Pollution Area (CPA) ne ka jaka ba jaboh bha da ka Central Pollution Control Board (CPCP), Delhi.
“Ha ka jingshisha, lah ban kdew ba ki don haduh 20 tylli ki karkhana bala ai kyrdan Red Category ha Burnihat Assam haba ianujor bad 5 tylli kiba don sha ka liang ka Meghalaya” ula bynrap.
U Conrad u iathuh ba kat kum ka jingbthah ka National Green Tribunal (NGT), ka Assam Pollution Control Board (APCB) kala pynkhreh ia ka Action Plan bad kala shim ruh ia ki sienjam ban tehlakam ia ka jingpynmih tdem jongki karkhana bad ban pynioh biang ia ka lyer kaba khuid ha ka thain Burnihat ka Assam.
Ha kajuh ka por, u Myntri Rangbah ka Jylla ula pyntip ba ka MSPCB kala thung ia ka Council of Scientific & Industrial Research-National Environental Engineering Research Institute (CSIR-NEERI), Kolkata ba kan pynlong ia ka Emission Inventory & Source Apportionment Study ia ka Byrnihat.
“Ka Emission Inventory ne ka jinglum jingkhein ia ka jingpynmih tdem, ka long ka atiar ba kongsan ban lah ithuh ia ka thymmei jong ki nongpynjaboh bad ba batai ba haduh katno ki pynmih tdem jaboh kat kum ka por” ula ong haba bynrap “Ka jingwad bniah kala dep mynta bad ka jingpynkhreh ia ka kaiphod ka dang iaid shakhmat”.
