Maham ka KSU ban pynthut ia ka suk ka sain ba shah kem ki Dkhot
Shillong, Iaiong 24 : Ki arngut ki briew ba dang shu kem da ki Pulit ka East Khasi Hills hynnin ka sngi halor ka jingshah pyniap ki Nongbylla bar jylla ha Mawlai Mawroh bad Ichamati, ki dei ki dkhot jong ka seng Khasi Students’ Union (KSU).
Kine ki arngut ki samla ki kyrteng u Gary Mawlieh uba na Mawlai, uba la shah kem halor ka jingjia ha Lumsohkhlur, Mawlai Mawroh bad uwei pat u dei u samla Cleenstar Shabong na Nongthymmai, uba shah kem halor ka jingjia ba jia ha Ichamati.
Ki Pulit kila ialam tian bishar ia kine ki arngut hynne ka janmiet hakhmat ka Iingkashari District Court bad ka iingkashari kala hukum ban phah ia baroh arngut sha ka police custody na ha ka kti ki Pulit ba kin ioh pynlong ia ka jingtohkit.
Ia u samla Cleenstar Shabong, la hukum ban set 7 sngi hapoh ka Police custody katba ia u samla Gary Mawlieh la hukum ban set haduh 12 sngi hapoh ka police cusody.
Ki Heh Pulit ki pyntip ba u samla Cleenstar Shabong u dei ruh uba la shah pynngat ha ki 10 tylli ki case pyrshah ia u nalor kane ka jingjia Ichamati katba u Gary pat ula shah pynngat ha 3 tylli ki case ia kaba artylli lah dep ban chargesheet.
Namar kane ka jingshah kem ki dkhot, ki Nongialam ka KSU bad ki dkhot, kila ialum paidbah hakhmat ka Iingkashari District Court ban ai mynsiem bad jingkyrshan iala ki dkhot ba shah kem bad kila pyrta slogan ruh katba ki Pulit ki dang ialam ia kine ki arngut kiba shah kem.
U President ka KSU samla Lambokstar Marngar bad General Secretary samla Donald Thabah, kila pynpaw ia ka jingbitar halor ka jingleh bym hok jong ki Pulit bad ki bor Sorkar pyrshah ia ki dkhot.
Kine ki Nongialam ka KSU kila maham ruh ia ka Sorkar ba lada ka dang bteng ban kem ia ki dkhot ka Seng, kane kan pyn bor ia ka Sorkar ban leh eiei, kaba lah ban ktah ia ka jingshongsuk shongsain hapoh ka Jylla.
“Kane ka jingkem ia ki dkhot KSU kam dei shuh kaba dang thymmai namar ha man ba don kino kino ki jingjia, ki Pulit kin thwet bad kem shuwa ia ki dkhot ka Seng….kane kala jia ha ki snem bala leit noh bad ka dang iai bteng haduh mynta” ong u samla Donald.
“Hynrei ngi sngewthuh ba ka jingthmu jong ka Sorkar ban set ia ki dkhot ka KSU ka long ban tehlakam ia ki ba kin leh ia ki kam na ka bynta ka bha ka miat jong ka Jaidbynriew. Hynrei ka khubor ba ngi phah sha ka Sorkar ka long, leh ia kaei kaba phi leh, kem ia ngi, set ia ki, bom, shoh ia ngi ruh hynrei kane kan ym pynduh mynsiem ia ngi ban jam shakhmat ha ka ban iada ia ka hok jong ka Jaidbynriew” ula bynrap.
Halor ka jingslem ban ioh ia ka jingbishar kaba hok jong u samla Lurshai Hynniewta uba shah pyniap ha ki kynhun bar jylla ha Ichamati ha u snem 2020, u samla Donald ula ong ba ka kamram jong ki Pulit ka long ban wad ia kito kiba donkti hynrei kiba khlem poi pat sha ka Iingkashari.
Ula pyntip ba ka KSU kan sa khot ia ka jingialang ban iakren halor kine kiei kiei baroh bad kan sa shim ia ka rai kaei kaba dei ban leh nangne shakhmat.
Lah ban kdew ba haduh 4 ngut ki dkhot ka KSU kila shah kem ha ki Pulit halor ka jingjia Ichamati ba kynthup ia arngut na Sohra, uwei na Mawlai bad uwei na Wahiingdoh.
