Shillong, Iaiong 24: Ka Khun Hynniewtrep National Awakening Movement (KHNAM) kala dawa na u chief executive member (CEM) ka Khasi Hills Autonomous District Council (KHADC) u Bah Pyniaid Sing Syiem ban pynkylla ne ban jer kyrteng noh daka ktien Khasi iaka shnong Khanapara kaba don markhap bad ka Jylla Assam
Haba kren sha ki lad pathai khubor u working president ka KHNAM u Bah Thomas Passah ula ong ba kane ka jingdawa kadei ban pynsuk iaki paidbah khamtam ki briew na bar Jylla ban tip, ba ka Khanapara ka dang dei ka shnong kaba hap ha u pud u sam ka Meghalaya.
“Ka ktien Khanapara kala dei lypa ka ktien nongwei bad kane ka pynthamula iaki briew na bar Jylla namar kata donkam ban pynkylla ne jer kyrteng noh haka ktien Khasi ban lait naka jingsngew shnong nongwei” la ong u Bah Thomas.
Haba iadei bad kane, u Bah Thomas ula kyntu iaki paidbah ban jingmut kum kino ki kyrteng thymmai haka ktien Khasi yn jer iaka shnong Khanapara kaba don ha Ri-bhoi District Meghalaya.
“Naka liang u CEM ula ong ban phah daka jingthoh bad ka district council ruh kan sa shong bishar” ula ong.
