Bthah ia u DGP bad SP ban nym ailad ban shah pynthut ki jingialang ialap elekshon
Shillong, Iaiong 09 : U President ka National People’s Party (NPP) Meghalaya bad Symbud Myntri Rangbah ka Jylla Bah Prestone Tynsong ha ka sngi Ba-ar, ula ong ba ka jingpyrshang jong ka Voice of the People Party (VPP) ban pynthut ia ki jingialang ialap elekshon jong ka NPP ka dei tang ka “kam kutlad’ namar ki tip ba kin rem ha ka elekshon.
“Ngam tip balei ki briew ki sngew kutlad. Hato dei namar ki tip ba kila shah rem, balei ba kin leh ia kum kine ki kam?. Ka rukom leh jong ki ka pyni ia kata” ong u Bah Prestone haba iakren bad ki nongthoh khubor.
U Bah Prestone ula kren ia kane halor ki jingjia kiba jia ha Umsning, Ri-Bhoi, Jaiaw, Rynjah ha Shillong bad kiwei kiwei ki jaka ha kaba ki nongkyrshan ka VPP kila leit ban pynthut ia jan baroh ki jingialang bala pynlong da ka NPP ha kylleng ki jaka ka Ri-lum Khasi bad Jaintia.
U Bah Prestone ula ong ba ula sakhi ha ka sien ba nyngkong ia kum kine ki jingjia ha Meghalaya namar ha ki snem bala leit noh, ka elekshon MP ka dei kaba ju iaid jai jai bha.
“Mynta ka kynti ka long kaba sniewbok khamtam ki dkhot ka VPP ki I kutlad, ka rukom pynthut jong ki ha man ki jingialang paidbah ka dei ka bym iahap satia” ula ong.
Haba kylli, u Symbud Myntri Rangbah ula ong ba ka NPP kan sab uh da ka jingujor hakhmat ka Election Commission of India (ECI) ban pynthikna ia ka jingialap elekshon ba jaijai ha ka por elekshon.
“Ngi hap pynthip sha ka ECI namar kum kine ki jingjia hi ngim kwah ba kin jia namar phim lah ban tip kaei kaban jia, khamtam ba ki jingialang paidbah ki long da la kem dum. Kino kino ki jingjia ki lah ban jia. Kumta, ngin sa mudui da ka jingujor bad ngin kyrpad ia ka ECI ba kan tuklar bad ban pynthikna ia ka jingialap elekshon kaba iaid beit iaid ryntih ha Meghalaya” ula ong.
Haba kyntu ia baroh ki seng sain pyrthei ba kin kiar na kum kine ki kam ki bym lah ban pdiang, u Bah Prestone ula ong “To ngin pynthkna ba ka burom jong ka Jylla ka kham long kongsan ban ia kiei kiei baroh. Ai ba ki jingialap elekshon kin iaid jai jai. Kino kino kiba kwah ban thep vote iano iano ruh, ngin ieh ha ka jingstad jong ki nongthep vote”.
Ha kajuh por, u Bah Prestone uba bat ruh ia ka tnad kam pohiing, ula bthah ia u Director General of Police (DGP) bad SP ba kim dei ban ailad ia kino kino ki jingpynthut ia ki jingialang jong ki seng sain pyrthei.
“Ngi la bthah ia ka Tnad Pulit. Na ka liang ka Sorkar ngi don la ka jong ka bor ban ong eiei halor kane bad ka jingbthah kala iaid bad nga la kren ia u DGP bad ki SP ba kin peitngor bad ruh ban nym ailad ia kino kino ki jingpynthut ha ka por ialap elekshon” ula ong.
