Dei ban iakren ka PTVC ia ka jingpynkynriah dukan madan beain, dawa ka MGSPHSVA

Shillong, Nailar 03 : Ka Meghalaya & Greater Shillong Progressive Hawkers and Street Vendors Association (MGSPHSVA) kala iai ban biangia ka jingdawa ba ki borkhmih ki dei ban iakren halor ka jingkynnoh pynkynriah beain ia ki dukan madan ha Khyndailad ha ka jingialang ban wan jong ka Provisional Town Vending Committee (PTVC) ka ban long la 6 tarik Nailar.

Ia ka jingialang jong ka PTVC la khot ban pynlong hadien ka jingleit iakhih jong ki nongshong dukan madan hakhmat ka Ophis ka Shillong Municipal Board (SMB) myn ha ka 1 tarik Nailar.

“Ngi dawa kyrkieh ban pynbeit biang ia ki jaka ba lait ha thain Khyndailad kumba la iakren hashuwa hapoh ka PTVC, ban pynwandur thymmai bad shna biang ia ka jaka shong dukan madan ha MUDA ha ka lynti kaba dei, haba shimkhia ia ka jingdonkam ki kam khaii bapher bapher, ban ai ia ki Licence sha baroh ki nongshong dukan madan bala dep survey bad ban leh survey biang ia kiba la shah ieh nalor kiwei kiwei” ong u General Secretary ka Association Shane Thabah ha ka kyrwoh bala pyllait ha ka sngi U Blei,

U ong ba ka Association ka pynrem jur ia ka jingpynkynriah ba dang shen ka Shillong Municipal Boad ia ki dukan madan na thain Khyndailad sha MUDA parking lot, haba niew ia ka “kaba beain”.

Ka Association kala kynnoh ba ia kane ka jingpynkynriah la leh khlem ka jingiasyllok bad ki nong shong dukan madan lane ka Provisional Town Vending Committee (PTVC), kaba pynkhein ia ka Street Vendors Act u snem 2014 bad ka hukum ka Iingkashari.

Ka MGSPHSVA kala pynpaw ruh ia kiba bun ki jingsngewkhia kynthup, ka jingbym lah ban pynmih ia ka thup ba khatduh, kaba la pynshisha jong ki nongshong dukan madan ba ioh licence, ka jingpynkynriah beain tang ha ka jingai notice ba lyngkot ka por, ka jaka shong dukan ka bym shngain bad ka bym pat biang ha MUDA Parking Lot, ka jingbym don ka Standard Operating Procedure (SOP) bad kiwei kiwei.