Shillong, Jymmang 23: U MLA ka South Shillong Constituency u Bah Sanbor Shullai hynne ka sngi ula leit ai da ka dorkhas ha u Symbud Myntri Rangbah ka jylla Bah Sniawbhalang Dhar ba kyntu ban pyndep noh ia ki Smart City Project hapoh 6 bnai.
Ha ka dorkhas, u Bah Sanbor ula pynpaw ia ka jingsngewnguh ia ka sorkar jylla bad sorkar pdeng ba pyntreikam ia ka Smart City Project hapoh ka South Shillong constituency bad ula pyntip ruh ba ula phah ia ka shithi sha ka tnad sorkar ha ka 25 tarik u Iaiong 2023, kaba kdew ia ki jaka kiba kongsan ban pyntreikam iaka integrated command and control centre (ICCC) bad ia kiwei ki tiar kiba kynthup ia ki smart poles, VMD, ECB & PAS, CCTV ITMS bad RF Towers bad kiwei kiwei.
Ula pyntip ba kum u MLA ula lum ruh ia bun tylli ki jingialang bad ki nongsynshar shnong, ki kynhun bad ki tnad sorkar kiba dei khmih ban pynthikna ba dei ban pyndep ha ka por kaba la buh ia kitei ki project.
U Bah Sanbor ula pynpaw ba ka smart road na Rhino Point shaduh Laban Last Stop, kam pat shym la sdang satia bad ym pat shimkhia ruh halor ka mat ban pyndait ia ki kor CCTV ha Cantonment Area da ki kynhun kiba dei ban pyntrei ia ka kam watla kala don bunsien ka jingphah ktien namar ba kitei ki jaka ki dei kiba kongsan.
Ula ong, katei ka projek kan long ka jingiarap ia ki pulit ban lah leh eiei halor ka jingjyllei ka jingdih drok bad ki kam tuh bad kan pynthikna ruh ha kaban lah pynneh ia ka shongsuk shongsaiñ.
U Bah Sanbor ula ong, baroh kiba dei kiba don bynta kiba kynthup ia ki dorbar shnongs, ki kynhun trei mon sngewbha ki dei ban ioh ia ki jingtip shaphang katei ka projek baroh kawei namar kan iarap ba pynthikna ba ki kam ki jam kin long kiba iaid beit iaid ryntih bad ba kan don ka jingsumar ia kitei ki tiar ki tar.
Ula ong ba ka sorkar kadei ban sdang ia ka Annual Maintenance Contract (AMC) ka ban treikam bun snem bad ban pynjlan ia ka Warranty khnang ba kan ai jingnyntoi shibun bad kan pynduna ha ka jingkut jingsep.
“Da kaba buh hakhmat ia kitei ki mat kiba kongsan, nga kyntu ia ka tnad ba kadei ban pyndep ia ka Smart City Projects ha South Shillong constituency hapoh ka 6 bnai” ong u Bah Sanbor.
Ula kdew ruh ba ki don bun ki jaka kiba ju mih ki jingjia hapoh ka Cantonment Area kiba kynthup ia ka Jhalupara, Lower Paltan Bazar, Paltan Bazar bad ki jaka ha Cantonment Beat House.
Kitei ki bynta kim dei ban shah kyntait ha kaban kynthup lang ha ka Smart City project ka ban long ka jingpynjot ne jingpynjulor ia ka jingthmu ban pynlong ia ka nongbah Shillong kaba shongkun lyngba ka jingpyndait ia ki tiar ki bapher bapher.
