Shillong, Naiwieng 02 : U MDC ka BJP na Tura Bernard N Marak ula pynpaw ia ka jingbym sngewtynnad halor ka jingbym pat lah pynurlong ia ka jingkular jong u Myntri Rangbah ka Jylla bad ka Sub Committee ba iadei bad ka jingsiew tulop ia ki nongtrei ka GHADC.
U Bernard ula ong ba ka jingkular ban siew ia ka tulop ba shisnem hapoh u bnai Risaw bad ka jingsiew ia ka tulop ba manla u bnai naduh u bnai Naiwieng, ka dang dei ka bym pat lah pynurlong.
“Nga kyrpad ia u Myntri Rangbah ba un bthah ia u CEM ba un pyllait noh ia ka tulop bad pynurlong ia ki jingkular bad ban ai ia ki jingmyntoi bala kular sha baroh ki nongtrei khlem ka jingleh shiliang khmat. Ki MDC ruh ki dei ban ioh lang kumjuh bad baroh ki jingmyntoi ki dei ban ai kumjuh namar kine ki jingmyntoi ki dei shibynta jong ka soskular iasuk bala iasoi hapdeng ka ANVC bad ANVC-B” ong u MDC ha ka kyrwoh ba pynmih ha ka sngi U Blei.
Ula kynnoh ba ha ka jingtohkit la lap ba bun na ki nongtrei kim pat ioh satia ia ka tulop bala kular, katba ka Executive Committee kala pynkiew ia ka allowance bad ki jingmyntoi ialade.
“Ka Executive Committee kala pynkiew ia ka allowance bad ki jingmyntoi ialade da kaba bynrap ia ka allowance kali, orderly bad nongniah kali casual, kaba la lam sha ka jingpynlut tam ba T.75,000 sha ka tulop jong ki, haba kyntait pat ban ai lang kumjuh ia ki MDC ki bym don ha ka liang Synshar. Bun na ki Executive Member kim ju kham wan sha Ophis hynrei ki leh smat bha haba ki pan ia kine ki jingmyntoi” kynnoh u Marak.
