Shillong, Jymmang 26 : U MDC ka BJP na Tura Bernard N Marak ula dawa ia ka Garo Hills Autonomous District Council (GHADC) ba kan ai lem noh ia ka Tribal Certificate sha ki Scheduled Tribe kiba sah ha Ri-lum Garo bad ruh ban pynrung kyrteng ia ka sngikha bad sngi iap.
Lah ban kdew hangne, tang ka Khasi Hills Autonomous District Council (KHADC) napdeng ki lai tylli ki ADC (JHADC bad GHADC) kaba dang ai ia ka Tribe Certificate kaba la long kum kawei na ki kot ki sla ba kongsan ban aplai ia ka Scheduled Tribe. Kane kan khanglad ia ki bar Jylla ban kam ST ka Jylla.
Ha ka shithi sha u Secretary ka GHADC, u Bernard ula ong ba la bun snem, ki nongshongshnong ka Ri-lum Garo kila shah pynbor ban pyndonkam ia ka Caste Certificate kum ka Scheduled Tribe Certificate.
Ula ong ba kane kala pyntroin ia ka snap kyrpang jong ki Garo. Ia ka Caste Certificate lah ban ai da u Deputy Commissioner tang ha ki jaka ki bym don satia ki ADC.
“Hynrei ha ri-lum Garo, watla ka dei ka jaka Sixth Schedule, u Deputy Commissioner u dang ai ia ka Scheduled Caste Certificate wat sha ki Scheduled Tribe, kaba la pyntroin pynban ia ki paid riewlum ka Jylla” ong u Bernard haba bynrap “U Deputy Commissioner u mihkhmat ia ka Sorkar kaba hap hapoh ka General category ne khein kyllum ia baroh, kumta u Deputy Commission um lah satia ban ait ia ka Scheduled Tribe ha ki jaka Sixth Scheduled”.
Haba pynpaw ba ki ADC ki dei ka bor ban ai ia baroh ki kot ki sla sha ki nongshongshnong ka Ri-lum Garo, une u MDC ka BJP ula ong “…kumta, la kyrpad ia phi ban ai noh ia ka Scheduled Tribe Certificate lyngba ka GHADC”.
Nalor kane, u Bernard ula ongn ba ka GHADC ka dei ruh ban leh ia ka jingpynrung kyrteng ia ki nong shnongshnong kiba dang shu kha ne kiba iap ruh kumjuh ym da ka Sorkar Jylla.
