Shillong, Nailur 15 : U Nongialam ka BJP bad MDC ka Tura Bernard N Marak ha ka sngi U Blei, ula dawa ia ka National People’s Party (NPP) kaba don ha ka Liang Synshar, ban ailad ia ka BJP ba kan ialam ia ka Executive Committee (EC) ha Garo Hills Autonomous District Council (GHADC) lada kam lah ban bat ia ki jingkular bala ai sha ki Nongtrei.
“Ka NPP ka dei ban ailad ia ka BJP ba kan ialam ha GHADC lada kam lah ban bat iala ka jong ka kular ba kala khlei sha ki nongtrei” ong u Bernard ha ka kyrwoh.
Ula ong ba ka NPP kala pynmih ia ka jingpynbna ha u 2018 ban pyllait ia ka tulop hapoh ka 5th Pay Commission bad naduh katei ka por bad hadien ba mynjur ia ka mang tyngka ha ka 5th Pay Commission, ki nongtrei kila shah thok naduh u 2018 da ka EC barim ka NPP kiba la siew ia ka tulop da ka 4th Pay Commission.
Haba kam ba tang ka BJP kaba lah ban weng ia ki jingbym biang ha ka rukom pyndonkam ia ka pisa ha GHADC, u Bernard ula ong “ Ka NPP kala pyrshang la bun snem ban kren sha Delhi halor ka GHADC ba kam lah ban treikam. Nga don ia ki sakhi jong ki shithi bala thoh da ki Myntri ka NPP”.
“Ka NPP ka dei ban aiti noh ia ka GHADC sha ka BJP ba kan ialam bad ngin pynthikna ia ka jingskhem ka synshar khadar, ka jingkhlain bad jingpynim pat ia ka ADC hapoh ka hynriew bnai” ula ong.
