Shillong, Jan 27: U Myntri ka Sorkar Jylla Bah Sanbor Shullai ula pynpaw ia ka jingsngewkhia ia ka jingkiew palat pud ka bai wai jaka hapoh Shillong Cantonment Area bad buh jingkylli halor ka jingpynkhein ia ka hok ban ioh bynta lang kumjuh ne ka Right to Equality, haba ianujor bad ki jaka ba marjan jong ka Municipal.
“Kam lah ban don artylli ki rukom lum khajna kaba iapher ha ka Cantonment bad Municipal Area,” ong u Bah Shullai.
U Bah Sanbor Shullai ula ialam ka kynhun ki nongialam ka BJP sha New Delhi, ha kaba kila iakynduh ia u Myntri Khynnah ka Sorkar Pdeng uba khmih ia ka Tnad Defence u Sanjay Seth bad ia ka Director General jong ka Defence Estate ka Shoba Gupta.
Ula aiti ia ka jingthoh ha kaba iadei bad ka jingkiew palat pud jong ka khajna ha ka Cantonment Area hadien ka jingpyntreikam ia ka Polisi treikam kaba shipor.
“Ngi kyrpad ia ka Ministry ban pynkylla noh ia ka polisi treikam kaba shipor bad ban pyntreikam ia ka 25% jong ka jingkhein lyngba ka STR jong kito kiba lah ioh lypa ia ka Lease” ong u Bah Shullai ha ka jingai jingthoh.
Ula banjur ba ka jingkiew palat pud ka bai wai kala lam ha kaban don ki mukotduma ban sahteng ha ka Supreme Court bad ki High Court bapher bapher hapoh ka ri.
U Bah Shullai ula pynpaw ba ka sorkar kadei ban thaw ia ka polisi kaba thikna ba ka bai wai kan long kaba iaryngkat bad ki jaka kiba marjan jongka Municipal Area. Kane ka kynhun ha ka jingialang bad ka Director kila kyrpad ban pyntreikam noh mardor ia ka Building Bye Laws bad ban pynkloi ia ka jingbhah ia ka Reservoir ne jaka pynlang um kaba 6 lak litar ban pyndap ia ka jingdonkam ha ka thain Shillong Cantonment Area.
U Bah Shullai ula khot sngewbha ruh ia u Myntri Khynnah ka Sorkar Pdeng ban buh ia u mawnongrim na ka bynta ki projek bapher kiban sa wan, kaban long syndon ka histori ha ka Cantonment Area.
“U Myntri Khynnah ka Sorkar Pdeng u lah ban wan sha Shillong ha u bnai Rymphang,” ula pyntip.
U Bah Shullai ula ai ksai ruh ba ka kynhun jongka BJP ka lah ban leit iakynduh ia u Myntri Rangbahduh ka ri ban pyntreikam mardor ia ki polisi treikam namar ka long kaba kongsan ban ioh shwa ia ka jingmynjur na ka kynhun myntri, kumba la iakren bad ki bor pyniaid jongka Tnad Defence.
