Shillong, Lber 23: U MLA bad MDC ka Mawhati u Bah Charles Marngar, hynne ka sngi ula ai dorkhas ha u Chief Executive Member (CEM) ka Khasi Hills Autonomous District Council (KHADC) Bah Titosstar Well Chyne ba dawa ban tuklar lem iaka Karbi Anglong Autonomous Council (KAAC) ba kan ym lum iaka khajna na ki nongrep synsar ha ki thain khappud.
Haba iakren bad ki nongthoh khubor, u Bah Charles ula iathuh ba ka tnad Forest jong ka KAAC kala ai wai sha ki riew shimet ban lum khajna na ki nongrep synsar bad kane kala ktah bha ia ki nongrep synsar ka jylla kiba sah ha ki thain khappud bad ka jylla Assam.
“Ki nongrep synsar kila shah lum 8 tyngka na ka shi kilo u synsar bad haba khein kyllum na kawei ka kali Pick Up kila lum haduh T.15,000. Kine ki khyrdop lum khajna ki don ha ki 5 tylli ki jaka kata ha Jatalong, Madan Umwang, Sabuda, Umlaper bad Mawsaladiang” ong u Bah Charles.
Ula ong, ba u synsar um dei shuh u mar khlaw hynrei ula dei u mar rep hynrei ki paid nongrep kila mad iaka jingeh kaba khraw naka jingshah lum khajna kaba kot haduh T.15,000 hi kali bad kane kala ktah jur ia ki nongrep kiba im da ka rep ka riang.
U Bah Charles ula kyntu ia u CEM ka KHADC ba yn iakren mardor bad ka KAAC bad ban phah sangeh mardor ia kane ka jinglum khajna na ki nongrep.
Pule lang ia kane: Dang iakren ka Sorkar bad ka AAI ban pyniar ia ka lynti hiar Liengsuin ha Umroi
