Shillong, Rymphang 09 : Ka BJP-Meghalaya Pradesh, kala dawa ia ka Defence Ministry ban pynlong ia ka jingtohkit halor ka jingpynkiew kynsan kynsan ka Contonment ia ka khajna baiwai jaka ha Shillong Contonment Area.
Ki Nongialam ka BJP hapoh ka jingialam u MLA Bah Sanbor Shullai ryngkat u President Rikman G Momin, kila iakynduh ia u Myntri Khynnah ka Tnad Defence Sanjay Seth ha ka 29 tarik Kyllalyngkot bad pyntip ha u ia ka jingpynkiew kynsan kynsan ia ka khajna bai wai jaka kaba la ktah jur ia ki nong shimrai jaka ha Shillong Contonment.
U Bah Sanbor ula kyntu ia ka Shillong Contonent Board, kaba hap hapoh ka Directorate General of Defence Estate, ba kan pynlong ia ka jingtohkit ia kane ka kam kaba long ka jingpynkhein ia ki kyndon balabuh ha ka 1937 CLAR.
Ka dor bala buh kumjuh naduh u snem 1990 ter ter, la sakhi ia ka jingkiew kynsan kynsan ha u snem 2009, kaba la ktah jur ia ki nongshongwai.
Ka kynhun kala iakynduh ruh ia u Director General ka DGDE u GS Rajeswaran uba la kular ba un sa shimkhia ban pynbeit noh kham kloi ia kane ka kam.
U Bah Sanbor u iathuh ba u don ka jingmut ban khot sngewbha ia u Myntri Khynnah ka Tnad Defence ban wan sha Shillong ha u bnai Iaiong khamtam ba une u Myntri ula pynpaw ia ka jingangnud ban wankai sha kane ka Jylla.
