Agartala, Nohprah 02 :Khyndiat por hadien ba uwei u nongtrei ka party CPI-M ula khlad noh na ka jingiakynad hapdeng ki nongkyrshan jong ka party liang pyrshah bad ki nongkyrshan ka sorkar synshar BJP kaba la jia ha Charilam ha ka 30 tarik u Naiwieng 2022, na ka liang u chairman ka TIPRA Motha u Pradyot Kishore Manikya Deb Barma ula dawa ban shim ka jingpynshitom kaba tyngeh pyrshah ia ki briew kiba donkti ha kane ka kam pyntriem.
Hynnin ka sngi uwei u nongtrei ka CPI-M u Sahid Mia 75 snem rta ula shah pyniap hadien ba ki nongtrei ka seng BJP la kynnoh ba kila pynlong ka jingthombor ha ka prokram ba la khot pynlong da ka CPI-M ha Charilam kaba hap hapoh Sepahijala district.
“Ki briew kila ialap halor ka jingkhlad noh u nongtrei ka CPI-M na katei ka jingiakynad, hynrei na ka bynta jong Nga une u briew u dei ruh u longkpa, u kpa lane u hymmen u para jongno re hashwa ba un dei u nongtrei jong ka party.Haba mih ka jingiakynad bad ka jingiap briew bad haba shim ba kadei kaba iaid beit ha ki kam iakynad sain hima sima, kumta ruh kane ka pyni ba kala don ka jingbakla kaba jur ha ki rukom treikam ki jong ki bad ka jylla.U nongshong shnong ka India ha kaba nyngkong ula duh noh iala ka jingim mynta ka sngi bad ym u nongtrei ka party bad ngi dei ban shim ia baroh ki lad jingiarap na ka bynta ka longiing longsem ka jong u ha kaba kum kane ka por ka jingeh,” thoh u Pradyot uba dei ruh u khun syiem ka Tripura lyngba ka Facebook.
Da kaba kyntu ban pynneh ia ka shongsuk shongsain, u Pradyot ula ong, “Nga kyntu na ka bynta ka shongsuk shongsain ha katei ka thain namar ki nongtrei ba shida bad ki paidbah ki dei ban sngewthuh ba ka jingialeh markynti na ka bynta ki riew sain hima kan ym iarap iano iano ruh.Sngewbha pynkut noh ia kine ki jingiaumsnam. Ki bor pulit ki dei ban ioh ia ka lad ban trei laitluid bad dawa ruh ban pynshitom da kaba tyngeh ia ki briew kiba donkti ha katei ka kam pyntriem.”
