Ba pyrshang pynkynriah ia ka kong Bindas sha Hospital
Shillong, Jylliew 10 : Ki Sengbhalang bad ka Seng Sain Pyrthei, kila dawa ban pynshitom ia u Superintendent of Police ka East Khasi Hills Rituraj Ravi halor ka jingkynnoh ba u pyrshang ban pynkit jubor ia ka kong Bindas Syiem, kaba dang shong shah jingit ha Parking Lot marjan ka Additional Secretariat, sha Hospital ha ka miet sngi Saitjain.
Ha ka shithi sha u Chief Secretary ka Jylla Bah DP Wahlang, u Working President ka KHNAM ula ong “Kumba iohi na ki khubor video, u SP ka WKH ha ka jingdum jong ka miet jong ka 8 tarik Jylliew khlem ka jingiadonlang kino kino ki Magistrate, kila pyrshang ban pynkynriah ia ka Kong Bindas kaba dang shah shah jingit la saw sngi hajan ka Additional Secretariat” .
“Ia kane ka jingjia baroh la ioh ring video da ki lad pathai khubor bad ym bakla ban ong ba hadien ba peit ia kane ka jingjia, ki nongshongshnong ka Jylla kila duh ia ka jingshaniah ha ki Pulit ka District hapoh ka jingialam u SP. Kumta, ngi dawa jur ba dei ban weng noh mardor ia u SP khnang ban wanrah pat ia ka jingshaniah ki paidbah” ula ong.
Ha ka shithi ujor sha ka Director General of Police (DGP) Kong Idashisha Nongrang, u President ka HITO ula ong “Ka jing leh u SP ka dei ka jingbym burom ia ka hok ki briew ban ialum paid da kaba jai jai ban iakhih, kaba la iada da ka article 19 (1)(b) jong ka Riti Synshar ka Ri”.
Kala ong ruh ba kat kum ki briew ba sakhi kiba donlang ha kane ka jaka, u SP ha kane ka miet ula buaid, kaba la pynmih ia u dak jingkylli halor ka jingshaniah ia une u SP.
Kumjuh ruh u Nongiasaid Ain ka Meghalaya High Court Enlang Sawian, uba dei u Nongialam ka Hynniewtrep Youth Council (HYC) ruh ula mudui ia ka jongujor pyrshah ia ki Pulit ka EKH hapoh ka jingialam u SP, sha ka Meghalaya State Commission for Women.
