Gangtok, Jylliew 10: 3 ngut ki briew kila khlad hadien ba don ka jingtwa khyndew bad shlei um hapoh ka shnong Majuwa kaba hap hapoh ka Yangang jong ka Namchi district.
Ki 3 ngut kiba khlad ki kynthup ia Yabha Subba, Bishal Rai bad Manita Rai.
Kane ka jingtwa khyndew bad shlei um kala jia haka por 5:30 mynstep jong ka 10 tarik hadien bala don ka jingther u lap bah kaba la pynshlei iaki wahduid jong ka wah Yangang.
Ka bor district ka Namchi District ka pyntip “Kala don ka jingshlei um hapoh ka shnong Yangang bad kiwei kiwei ki jaka. Ki jingjia kila sdang na Bhaleydhunga jong ka wah Yangang bad namar kane kala don ruh ka jingtwa khyndew bad jingshlei ki wahduid”.
Ki bor District ki pyntip ba 5 tylli ki ing kila shah rah, 3 ngut la pynthikna khlad, 1 mynsaw bad dang shah sumar ha District Hospital Singtam.
La iathuh ba ki don kiba mynsaw kiba dang shah sumar ha STNM Hospital bad ka jingdon kiba mynsaw ka lah ban kot sha 8 ngut.
Iaka ba mynta ka surok ban leit sha Yangang kala shah khang ha Sirsey katba ka surok ha Dikchu ba pyniasoh iaka North Sikkim kala shah khang ha Makha.
