Shillong, Jylliew 9: U Myntri sorkar ba peit ia ka tnad pule puthi Rakkam A Sangma u la pynpaw ba hadien ba mih lut ki jingshisha halor ka jingshah pyniap u Raja Raghuvanshi ha thain Sohra, kito ki briew kiba donkti ban pynbudnam sniew ia ka jylla Meghalaya kidei ban panmab.
Haba ia kren bad ki lad pathai khubor u Rakkam u la ong, “Ha ka jingsngew jong nga, kito kiba kynnoh ia ka jylla Meghalaya bad kumjuh ruh ia ki paidbah kidei ban panmab”.
U Myntri u la ong ruh ba u sngewsih bha ban iohi ba ki briew ha ki social media bad kumjuh ruh ki national media kila kynnoh ia ka jylla bad kumjuh ruh ia ki paidbah nongshongshnong, khlem da tip ia ka jingshisha ia kaei kaba jia.
“Ngim shym long kum kita ki briew bad ka hok bad ka jingshisha mynta ka la paw shai kdar,” u la ong haba ai jingiaroh ia ki pulit ba tang hapoh khydiat por kila lah ban kem ia kiba donkti ba kynthup ruh ia ka Sonam Raghuvanshi, ka tnga kaba phah pyniap iala u lok Raja Raghuvanshi, katba ki dang wan leh honeymoon ha Sohra.
