Shillong, Jylliew 10: U Myntri ka tnat pule puthi u Rakkam A Sangma hynne ka sngi u la ong ba ka Inner Line Permit (ILP), lada pyntreikam ha kane ka jylla Meghalaya kam dei ban ktah ia ki nongjngohkai pyrthei kiba wan sha kane ka jylla.
“Ka long kaba biang bad kaba bha lada lah ban wanrah ia ka ILP khnang ba ngin lah ban pyrkhing iaka jingrung ki briew na shabar shapoh ka Jylla hynrei la ka long ka ILP ne kano kano ka ain (System) kam deipat ban khanglad ia ki nongjngohkai pyrthei ban wan sha kane ka Jylla namar ki nongjngohkai pyrthei ki long ki nongpynioh kamai iaki nong shong shnong ka Jylla” la ong Rakkam haba kren sha ki nongthoh khubor.
Haba pynpaw ba ka kam jngohkai pyrthei ka dei u paia jong ka ïoh ka kot jong ka Jylla Meghalaya, u Rakkam u la ong, “Namar kata, ka kam jngohkai pyrthei ka dei ban kiew bad ka dei ban ai jingmyntoi ïa ki briew, kiba ïoh kamai na kane. Kumta to ngin ïatreilang khnang ba ka kam jngohkai pyrthei jong ngi kan kiew bha.”
Haba pynpaw ia ka jingsngewkhia halor ka jingwan buhai shnong beain ki briew na bar ka Jylla, u Myntri u la ong ba ka Jylla ka donkam ia ka ILP ban pyrrkhing ia ka jingtuid jong ki briew kiba wan rung beain sha kane ka Jylla.
Katba ka jylla Meghalaya ka dang ap ïa ka jingmynjur jong ka Sorkar Pdeng ban ioh ILP, Myntri u la ong ba ka jylla ka la don lypa ki ain lane ki lad ki lynti kum ka Sixth Schedule, Land Transfer Act bad ka Meghalaya Residents Safety and Security Act (MRSSA), 2016 ban pyrkhing iaka jingwan buhai shnong beaiñ ki briew sha kane ka Jylla.
, lada pyntreikam ha kane ka jylla Meghalaya kam dei ban ktah ia ki nongjngohkai pyrthei kiba wan sha kane ka jylla.){kind=link}