Shillong, Naiwieng 03: Ki sengbhalang kiba pynlong iaka jingiakhih lyngba ka “Save Hynniewtrep Mission” kila pynpaw iaka jingbymsngewtynnad halor ka jingnoh shilliang palat jong ka bhah thungkam ne ka Job Reservation Policy hapdeng ki Khasi bad ki Garo.
U President ka HYC u bah Robertjune Kharjahrin ula ong ka bhah thungkam ha ka jylla kala long kaba noh shilliang palat mynta la 50 tylli ki snem haba pynpaw ba u paid Khasi Jaintia u kham bun ban iaki paid Garo bad kam long kaba iahap ba u 16 lak bad u 8 lak yn ioh kumjuh iaka bhah thungkam.
Ula ong, ka jingbhah kam kadei ban pynshong nongrim katkum ka jingbun paid, hynrei ki jaidbynriew Garo nalor ba ki duna paid ki ioh kumjuh ia ka bhah naduh u snem 1972 bad kane ka jingnoh shilliang kala buh haka jingjynjar ia ki Khasi Jaintia ban iohkam namar ka jingnoh shilliang palat jong katei ka policy bhah kam.
Ula iathuh, ba ki 5 tylli ki sengbhalang ha ka jingiakynduh ia u Symbud Myntri Rangbah ka jylla u Bah Prestone Tynsong kila pynsngew halor katei ka jingnoh shilliang jong ka jingbhah kam bad na ka liang u Bah Prestone ula ong, ba kin sa ia shong pyrkhat halor kane ka mat.
U Bah Robert ula ong, ki sengbhalang ki sngewthuh ba katei ka ishu ka long kaba ktah bha bad kan long ka bym don jingmut lada ym lah pat ban pynkylla noh iaka bad lada ym lah ban leh eiei ia kane kan bha shibun ban pyniakhlad noh bad ban ai noh la ka jong ka jylla ia ki Hynniewtrep bad ki paid Garo.
