Rai ban pynlong da ki Jingialang Paidbah ha kylleng ki jaka
Shillong, Naitung 30 : Ka Meghalaya State Coordination Committee of the Coal Owners, Miners, Exporters, Transporters and Dealers Forum (MSCCCOETDF) kala rai ban pynlong da ki jingialang paidbah ha kylleng ki jaka ban pynbor ia ka Sorkar Jylla ba kan pyndam noh mardor ia ka Standard Operating Procedure (SOP) ba kynnoh be-ain, ha kaban ai Licence lane ka Mining Lease ia u dewiong hapoh ka Jylla.
“Ia kane ka rai la shim hadien ba ka Sorkar Jylla kam shym la lah ban leh eiei ia kane ka kam wat hadien ka jingaiti ia ka dorkhas ha u Myntri Rangbah ka Jylla Conrad K Sangma myn ha ka 2 tarik Naitung” ong u Dkhot ka Forum Reginald Shylla haba iakren bad ki nongthoh khubor hynne ka sngi Ba-ar.
Ula pyntip ba ka forum kan pynlong ia bun ki jingialang paidbah ha kylleng ki District ba don kyrhai u dewiong hapoh ka Jylla, ban pynsngewthuh ia ki paidbah halor ka SOP bala pynmih da ka Sorkar Meghalaya kaba 5 tarik Lber, 2021, kaba mar pyrshah ia ka Mining and Minerals (Development and Regulation) Act, 1957 bad kane kajuh ka jingpynbna (SOP) ka dei kaba la pyntreikam da ka Jylla Meghalaya shabar na ki nongrim jong ka ain.
Ka SOP kala dew ba ka jingai ia ki prospecting licence lane mining lease ia u dewiong ha Jylla Meghalaya kan long tang ia ki jaka ki bym duna ia ka 100 hectare.
“Hynrei, kane ka SOP kala pynduhlad ia ki trai riewlum ka Jylla kiba don ia ka jaka ba duna 100 hectare ba kin aplai ia ki licence na ki bor ba dei khmih” ong u Bah Shylla haba bynrap “Ngi sngew iahap ban ong ba kane ka SOP ka dei kaba pyn myntoi tang ia ki hehspah bad pynduh lad ia ki briew kiba don duna ia ka 100 hectare ka jaka. Namar kata,ki briew kim don lynti lait na ka jingdie ia ki jaka sha kine ki hehspah, kaba thew sha ka jingiuhroit ia ka khyndew ka shyiap u paidbah”.
Ula kdew ruh ba ka Mineral Concession Rules, 2016 bad ka amendment ba 11 tarik Naitung, 2017, 29 tarik Kyllalyngkot 2018, 20 tarik Nohprah, 2018, 24 tarik Kyllalyngkot, 2019, 21 tarik Nailar, 2020 bad 16 tarik Kyllalyngkot, 2021, kim shym la don ia ki kyndon ba ailad ne aibor ia ki briew kiba don jaka ba hapoh 100 hectare ba kin aplai ia ki licence/mining lease.
Nalor kane, u Bah Shyllaula pyntip ba ka Forum kala leit iakren ruh ia laingut ki MP kata u MP ka Tura Saleng A Sanma bad MP ka Shillong Ricky AJ Syngkon bad u MP ka Rajya Sabha Dr WR Kharlukhi- ba kin tuklar lem mardor bad rah ia kane ka kam ha Parliament lem bad ka Ministry of Coal khnang ban wad ia ki lad ki lynti ha kaban leh eiei ia ki jingeh bala mad ia ki paidbah ka Jylla haba phai sha ki kam dewiong.
Ula pyntip ba ka Forum kala leit tynjuh ruh pyrshah ia kane ka SOP hapoh ka Iingkashari Meghalaya High Court.
“Kane ka long namar kat kum ka MMDR Act, 1957 la ong ba ka jaka ba duna eh na ka bynta ka mining lease ka dei ban long ym duna ia ka 4 hectare kaba mut ba ngi lah ban aplai ia ka propecting licence hynrei ka jingkylli ka mih mynta ban a kane ka kyndon ain, ka Sorkar Jylla kala buh ia ka jaka ba duna eh ban long haduh 100 hectare. Kane ka pyni ba ka Sorkar ka kwah ban iuhroit ia ka kamai jakpoh jong ki briew bad thombor ia ka hok jong ki paidbah tang ban pynmyntoi ia ki katto katne ki nongkhaii hehspah” ula kynnoh.
