Shillong, Nohprah 09 : Ki paid nongshongshnong ka thain Shilliang Um ha South West Khasi Hills District kila kyrpad ia u Myntri Rangbah ka Jylla Conrad K Sangma ban buh noh ia ka Administrative Block ba thymmai ha ka thain Mawsaw, haba pynpaw ia ki jingeh ban ioh ia ki jingshakri ka Sorkar namarka jingjngai na ka Block ba don mynta.
Ha ka shithi bala phah sha u Myntri Rangbah ha ka sngi Ba-ar, ki nongshongshnong kila iathuh ia ki jinglong ki jaka hapoh ka thain, kynthup ia ka jingdon ki nongshongshnong ba 35,604 ngut ha ki 118 tylli ki shnong ba hap ha ki 10 GS circle.
Kila kdew ba ka jingbym don ka Administrative Block ha ka thain klaa buh jingeh ha ka jingwan poi ha ka por kaba biang ki skhim bha lang ka Sorkar, ki kam pynroi, ki jingshakri haba iadei bad ka pule puthi, ki jingiarap ha ka koit ka khiah, ki kam khyndew bad ki jingiarap ha ki khep ba donkam kyrkieh.
“Ka jingpynkha ia ka Administrative Block ba thymmai ha ka thain Mawsaw kan wanrah ia ki jingmyntoi ba khraw ia ka thain, kynthup ka jingpynioh ia ki jingshakri ka Sorkar ia ki hajar ngut ki paidbah ha ki jaka nongkyndong, ka jinglah pyntrei kam bha ia ki skhim ka Sorkar bad ki kam pynroi, kan pynkhlain ia ki lad ki lynti haba iadei bad ka pule puthi bad ka koit ka khiah, kan khate ia ka por leit por wan bad jinghap pynlut pisa ki paidbah nalor kiwei kiwei” ong ka shithi.
Ki paidbah kila pyntip ruh ia u Myntri Rangbah ba ki don kumba hynniew ngut ki trai jaka kiba la pynpaw ia ka jinglong ba kloi ban ai sngewbha ia ka jaka ban shna ia ka Administrative Block. Kila kyrpad ia ka Sorkar ba kan tuklar bad pynurlong nloh kloi ia kane ka jingtyrwa.
