Shillong, Naiwieng 29:Ka United Garo Autonomous Council Movement Committee (UGACMC) kala kyrpad ia u Myntri Rangbah ka Assam u Himanta Biswa Sarma ban thaw iaka Garo Autonomous Council, kaba dei ka jingdawa kaba la sahteng jong ki paid Garo kiba don palat 7 lak ngut haka jylla Assam.
Ha ka dorkhas kaba la phah da u Chairman ka UGACMC u Pholince Sangma sha u Himanta Biswa Sarma, ula pynpaw ba ki Garo kidei ban ioh noh iala ka jong ka Autonomous Council ha Assam ka ban long hapoh ka riti synshar ka ri na ka bynta ban pynwandur iala ka lawei ha kaba iadei bad ka kam sain pyrthei, ka jinglong tynrai, ka pule puthi bad kumta ter ter.
Ula pynpaw ruh ba ka don ka bor kaba kyrpang na ka bynta ki riewlum kiba shong basah hapoh ka ri India katkum ki kyndon jong ka Schedule V & VI jong ka riti synshar ka ri ha kaba iadei bad katei ka bynta.
“Kumta naka bynta ka jingkiew ka roi ka par ha baroh liang, ka long kaba donkam ia ka sorkar Assam ban shimkhia ia katei ka mat bad ban ai iaka hok na ka bynta ki paid Garo bad ban shim ia ka sienjam ban kyntiew kyrdan iaka Garo Development Council sha ka Garo Autonomous Council ha ka jylla Assam. Kumta nga kyntu ba phin shimkhia lem ia kane ka jingkyrpad ka jong ngi na ka bynta ka bha ka miat jong ki paid Garo” la pynpaw haka dorkhas.
Ka UGACMC kala pynpaw ba ki riewlum Garo kidei ki jaidbynriew kiba ar kiba bun paid hadien jong ki jaidbynriew Bodo kiba don ha Assam bad dei tang da ka jingpynurlong iaka jingdawa ban ai iaka Garo Autonomous Council ha Assam yn lah ban pynurlong iaka jingangnud jong ki riewlum Garo kiba sah ha Assam khnang ba kin lah ban pynneh pynsah iaka riti dustur tynrai, ka ktien ka thylliej bad kumta ter ter.
Ka UGACMC kala pynpaw ba kila dawa la slem naka sorkar Assam ban ai iaka Garo Autonomous Council hynrei ka sorkar kala ai pynban da ka Garo Development Council (GDC) ia ki Garo ha Assam katkum ka jingpynbna paidbah kaba la mih ha ka 28 tarik u Kyllalyngkot 2021.
Ka Committeee kala iaroh ruh iaka rai jong ka sorkar Assam ban iada ia ka hok bad ki jingmyntoi kaba ki riewlum Garo kidei ban ioh bad ki Garo kidei kiwei napdeng ki riewlum kiba dei ban ioh iaka jinglaitluid na ka bynta ban pynurlong iaka nongrim kabala pdiang ha baroh kawei ka pyrthei kata ban ioh ia ka hok ha ka kam synshar khaddar.
