Shillong Nailar 29: Ki nongshet ja jong ka Mid Day Meal hapoh lama jong ka All Jaintia Mid Day Meal Workers Union hynne ka 29 tarik kila wan tur sha nongbah Shillong ban dawa na ka sorkar jylla bad na ka sorkar pdeng ban pynkiew noh ia ka song jingiarap pisa bad ka jingsiew ba manla u bnai.
U Bah K Pariat ula ong, ki nongshet ja ki ioh tang 1000 tyngka shi bnai kata 900 tyngka na ka sorkar pdeng bad 100 tyngka na ka sorkar jylla bad ha ka shi sngi la pynshongdor 30 tyngka iaka bai bylla ka jong ki.
“Ngi dawa ba ka sorkar pdeng kadei ban pynkiew noh 4000 tyngka bad ka sorkar jylla kan pynkiew noh 1000 khnang ba ngin ioh noh iaka tulop kaba 5000 tyngka shi bnai khnang ba ki nongshet ja Mid Day Meal kin lah ban kyrshan iaka iing ka sem”.
“Kumba long mynta ngim lah shuh ban im da kaba ioh tulop 1000 tyngka shi bnai” ong u Bah Pariat uba long u Nongaibuit ka All Jaintia Mid Day Meal Workers Union.
U la ong katei ka jingai jingiarap kadei naduh 20 snem mynshwa bad kala dei ka por ban pynkiew noh iaka jingiarap pisa bad na ka liang ka seng kala dep ban phah da ka jingthoh sha u Myntri Rangbahduh ka ri bad ia u Myntri Rangbah ka jylla ban dawa pynkiew noh ia katei ka pisa hynrei haduh mynta kim shym la ioh ia kano kano ka jubab.
U Bah Pariat u la ong, ki don 18457 ngut ki nongshet ja Mid Day Meal ha ka jylla baroh kawei bad 90 na ka 100 kidei ki longkmie.
“Kiba bun ki longkmie kiba dei ki nongshet ja Mid Day Meal ki la shah ieh lok tang naka daw ba kim ioh iaka pisa man la u bnai. Kane kadei ka sien kaba khatduh ba ngin ialeh ban im bad lada ka sorkar ka ong ba kam treh ban pynkiew ia ka pisa dei ban pynduh noh shi syndon iaka Mid Day Meal na Meghalaya, ngi ruh ngin im laitluid noh kum ki nongshong shnong bad ngi khnih lynti ba ka sorkar kan ai ktien noh mynta ka sngi” ong u Bah Pariat.
U la ong, lada ka sorkar ka lah ban pynlut 15 klur tyngka ban pynlong ia ki tamasa ki bapher bapher ha ka jylla, kala dei ban ai da katei ka pisa ban siew tulop 9 bnai iaki nongshetja Mid Day Meal ha ka jylla.
Une u nongaibuit ula pynpaw iaka jingbynniaw ba ki nongshet ja kim ju ioh tulop ha u bnai Nohprah bad Kyllalyngkot na ka sorkar da kaba ai daw bym long skul, hynrei kaba lyngngoh pat ka long ba ki nonghikai skul ki ioh tulop beit ha kitei ki bnai.
Ha kane ka sngi, da ki spah ngut ki nongshetja Mid Day Meal kila wan tur sha Nongbah Shillong ha kaba kila leit ban shong hajan ka Aaditional Secretariat hynrei namar ka jingbym ioh jingbit na ki bor pyniaid District, kila leit shong noh hakahmat ka ophis treikam jongka MBoSE ban pynlong iaka jingiakhih kaba Ar sngi ban dawa iala ka hok..
