Shillong, Jylliew 19: Ka kynhun ki nongkamai kali arshaka-ka ‘Ride to Serve Shillong’ kala ia ka dorkhas thymmai sha u Symbud Myntri Rangbah ba khmih iaka tnat Trasport Bah Sniawbhalang Dhar ba phah tuklar kyrkieh halor ka jingkyrpad bala dap lai snem ban ai ia ka single permit ba kin kamai.
Ha ka dorkhas, ka Kynhun kala pynpaw ba naduh ka 24 tarik u Jylliew 2023, ka la thoh shaka tnat ban shah iaki ban kamai daka Single Permit khlem da donkam ban shah teh kyndon bad ki aggregator ne bad ki Company.
Ka Kynhun kala pynpaw ba ka jingshah ban kamai daka Single Permit kan thaw ïa ka rukom treikam kaba shai bad haka juh ka por ka plie lad haba iadei bad ka kamai kajih jong ki samla.
“Haduh mynta, ngim pat ïoh kano kano ka jingpdiang ne jubab kaba pura naka tnat watla ngi la ai jingmut bunsien” la kdew ka dorkhas.
Ka kynhun ka la dawa na u Symbud Myntri Rangbah ban bthah ïa ka tnat Transport bad iaki ophisar jong ki District ban pynsangeh noh ïa ki kam pynjari aiñ, ka jing ai challan, bad ki jing bat ïa ki nongñiah arshaka katba ka Sorkar kam pat jubab iaka jingtyrwa ka Kynhun.
Kala ban jur ba ka jingthmu jong ki kam dei ban ioh jingbit ba kyrpang, hynrei ban ïoh ïa ka lad kaba long katkum ka aiñ bad kaba lah ban treikam hapoh ka jingpeit jong ka Sorkar Jylla.
