Shillong, Rymphang 11: Ka Joint Action Committee ki Muster Roll Labour Union, kala pynpaw ia ka jingbynniaw bad jingbitar ia ka Sorkar Meghalaya halor ka jingbym leh eiei ban pyntreikam ia ka Labour Code 2025, kaban ai jingshngain bad jingmyntoi ia ki nongbylla sngi.
“Ngi sngew lyngngoh ba naduh u Naiwieng 2025, ka Sorkar jylla Meghalaya kam shym la ai kano kano ka jingpynbna ban pyntreikam ïa ka Labour Code ha Meghalaya” la ong u Chairman ka JAC Bah Pariat haba iakren bad ki nongthoh khubor hynne ka sngi Balang.
“Ngi lah shimkhia ia ka mat halor ka labour code bad ka tnad Labour kala pyntip ia ngi ba ki dang iaid shakhmat ban shna ia ki Rules ha ka jylla hynrei wat hadien 6 bnai ruh kim shim la pyntreikam ia ka.
Kane ka long kaba sngewbynniaw bha namar ba ki Muster Roll ki treikam man la ka sngi hynrei ka Tnad Labour bad ka sorkar Meghalaya kala shim sting bha ia ka kam.
Ia ka Labour Code 2025, la bthah da ka Sorkar India, kaba kular ban ai jingmyntoi kum ia ka Pension, Employee Provident Fund bad ka jingshngain ia ki nongtrei. Hynrei ka sorkar Meghalaya kam pyntreikam ia ka watla ka seng kala phah ia ka dorkhas la bunsien ban pynkynmaw.
U Bah Pariat ula banjur ba ka jingbym leh eiei ka sorkar kala ktah jur ia ka rukom im jong ki nongtrei muster roll, kiba iakhun bad ka jingkiew dor ki marbam mardih bad ki tiar ki tar.
Ka seng kala pynpaw ruh ia ka jingsngewkhia halor ka jingbym pyntreikam ia ka Employee Provident Fund (EPF) bad ka jingbym pynmih ia ka jingpynbna halor ka Consumer Price Index, watla ka Sorkar India kala pynhiar ia ka khajna GST ia ki marbam mardih.
“Kawei ka pylleng ka shongdor 10 tyngka bad u dai u shongdor T.100 shi kg kaba heh ban ia kiwei pat ki jylla” ong u Bah Pariat bad ka pynsngew ia ka jingmad jingeh jong ki nongtrei ha ka jingim ka jongki.
U Myntri Rangbah Conrad K Sangma, ula khot iakren ia ka seng hynrei kim shim la ioh ia kano kano ka jubab haduh mynta.
“U Myntri Rangbah dalade hi ula khot ia kren ia ngi, kane ka jingpynslem kala pynbynniaw bha ia ngi baroh ki nongtrei muster roll” ong u Bah Pariat.
