Shillong, Jymmang 11: Ki lai tylli ki seng kiba kynthup ia ka JSU, JYF bad ka EJNC hynne ka sngi Palei, kila iakynduh ia u DFO ka Jaintia Hills Division bad dawa ba ka Compensatory Afforestation (ka skhim thung dieng) jong ka MeECL ka dei ban treikam hapoh ka Ri-lum Jaintia ym sha kiwei pat ki District jong ka jylla.
Ki nongialam ka JSU, JYF bad EJNC kila ong, ba kim lah ban pdiang satia ba iaka Compensatory Afforestation, ka Meghalaya Energy Corporation Ltd ka thmu ban bujli thung dieng sha Maweit, West Khasi Hills District hynrei dei ban thung bujli beit ia ki dieng ha rilum Jiantia.
“Ia ka Myntdu Leskha Stage 2 Project ka hap hapoh ka jingpeit jong ka Jowai Forest Division ha East bad West Jaintia Hills District bad na ka bynta katei ka projek la hap ban pom ia ki dieng ha ka jingjngai kumba 11.349 Hectare” kila ong.
“Kumta ngi ki lai seng, ngi ban jur ia ka tnat Forest bad ia ka Meghalaya Energy Corporation Ltd ba kan bujli ia ka jingthung dieng (Compensatory Afforestation) ha ki jaka ba hap hapoh ka Jaintia Hills ym sha kiwei pat kị District namar ka project ka hap hapoh ka East bad West Jaintia Hils District” kila bynrap.
