Shillong, Jylliew 07 : Ki Sengbhalang Garo kiba treikam ha Ri-lum Khasi, kila dawa ia ka Sorkar Jylla ba kan ai bynta lem ia ki paid Garo kiba shong ba sah ha Ri-lum Khasi na ka bhah 80% jong ka Job Reservation Policy bala mang sha ki Khasi-Jaintia bad Garo, haba kam ba kine ki paid Garo kim ju ioh bynta satia na kane ka bhah naduh ba sdang pyntreikam ka State Reservation Policy hapoh ka Jylla.
Kine ki Sengbhalang ki kynthup ia ka All Khasi Hills Achik Federation, Garo Students Union Khasi Hills Zone, Achik Holistic Awakening Movement SWKH Zone bad ka United Achik Youth Federation.
Kine ki Sengbhalang kila leit ban aiti da ka dorkhas hynne ka sngi Balang, ha u Myntri ka Tnad Pule Puthi Rakkam A Sangma ba kyrpad ba un pyrkhat lem ia ki jingeh jong ki paid Garo ba sah ha Ri-lum Khasi bad ban iakren lem ruh ha ka Sorkar Jylla ba kan leh eiei halor kane ka kam.
“Ngi kum ki President, Secretary bad ki nongialam sengbhalang Garo hangne ha i-um Khasi ngi kwah ban pyntip ba ki don bun ki jaidbynriew Garo kiba shong basah ha kylleng ki bynta jong ka Ri-lum Khasi naduh ki por hyndai hynthai haduh mynta bad bun ki Garo ki don iala ki jong ki jaka ne A.khings Land kiba hap hapoh u pud u sam jong ki distrik bapher bapher” pynpaw ki Nongialam ki 4 seng ha ka dorkhas.
“Ki Garo kiba sah ha Ri-lum Khasi ki don ia kajuh ka hok kumba la kdew haka Riti Synshar ka ri kumba ioh ki jaidbynriew Khasi, hynrei naduh ba la pyntreikam iaka Reservation Policy ha u snem 1972, ki Garo kiba sah ha kylleng ka ri Khasi kila duh bynta na ka bhah 80% jong ka Reservatiuon Policy bala mang sha ki Khasi-Jaintia bad Garo” kila bynrap.
Kat kum ka jingong jong ki, “Kam shym la don satia kano kano ka kyndon ne ka jingpynbna paidbah kaba la pynmih da ka sorkar Meghalaya ka ban khang pyrshah ia ki jaidbynriew Garo kiba sah ha Ri-lum Khasi ban ioh jingmyntoi na bhah”.
Kine ki Sengbhalang kila pynpaw ruh ba ki don bun tylli ki skul Garo ha kylleng ka Ri-lum Khasi ha ki jaka kiba ki Garo ki bun paid bad naka liang ka sorkar jylla kala sdang ban pynrung iaka ktien Garo ha ki skul sorkar hynrei kaba lyngngoh ka long ba ki nonghikai kiba la shah thungkam ban hikai iaka ktien Garo kim dei satia ki Garo ne kiba la don ia ka syrnot ba kila pyndep iaka jingpule haka ktien Garo.
“Ka jingbym don ki nonghikai kiba biang ban hikai iaka ktien Garo ha ki skul kala buh ha ka jingeh kaba khraw ia ki khynnah pule Garo ban ioh iaka jinghikai kaba biang ba kin pule iaka Garo, kumta ban weng ia kane ka jingeh bad ban ai jingmyntoi ia ki khynnah pule. Ngi kyrpad ban shimkhia lem halor kane bad ba ki bor kiba dei khmih kin shim ia ki lad ban thung da ki Garo ba kin hikai iaka ktien Garo ha kylleng ki skul sorkar” kila ong.
