Guwahati, Jymmang 12 : Haduh 10 ngut ki MLA kiba dei na ki Jaidbynriew riewlum bapher bapher ka Jylla Manipur, kila dawa ia ka Sorkar India ba kan ai Jylla noh la ka jong ia ki paid riewlum ki bym dei ki Meitei da kaba phiah ia ka Manipur .
Kine ki 10 ngut ki MLA ki dei u Haokholet Kipgen MLA ka Saitu, Ngursanglur Sanate MLA ka Tipaimukh, Kimneo Haokip Hangshing MLA ka Saikul, Letpao Haokip MLA ka Tengnoupai, LM Khaute MLA ka Churachandpur, Letzamang Haokip MLA ka Henglep, Chinlunthang MLA ka Singngat, Paolienta MLA ka Saikot, Nemcha Kipgen MLA ka Kangpokpi bad u Vungjagin Valte MLA ka Thanlon.
Kat kum ka jingong kine ki MLA, ka jingkulmar bad ka jingiaumsnam kaba jia ha Manipur naduh ka 3 tarik Jymmang ka dei kaba la suhbuit da ka Jaidbynriew Meitei kaba heh paid pyrshah ia ki jaidbynriew Chin, Kuki, Mizo bad Zumi, kaba la kyrshan da ka Sorkar Jylla.
Kila ong “Ki briew jong ngi kim lah shuh ban im ha Manipur namar ka jingbuhshun ia ngi ki paid riewlum kaba long haduh u pud ba ym map shuh wat ki MLA, ki Myntri Sorkar, ki Pastor, ki Ophisar Sorkar, ki Pulit bad ki riew paidbah naduh ki kynthei haduh ki Khynnah khlem da iakren ia ka jingpynjulor ia ki jaka mane Blei, ki Iing ki sem bad ki Nongkynti”.
“Namar kata, kum ki Nongmihkhmat paidbah, ngi mynta ngi ieng halor ka jingsngew ki briew lajong bad phah ia ka jing angnud jong ki ban phiah noh ia ka Manipur” kila bynrap.
Kine ki MLA kila ong ruh ba kila rai ban pynlong ia ka jingiasyllok bad la ki jong ki briew kham kloi katba lah haba iadei bad ka sienjam kaba dei ban shim da ma ngi kum ki riewlum ka Jylla.
“Naba ka Jylla Manipur kam shym la lah ban ai jingiada ia ngi, ngi pan na ka Sorkar India ban ai noh iala ka jong ka jingsynshar kat kum ka Riti Synshar ka Ri bad ba ngin ia im suk noh kum ki para marjan bad ka Jylla Manipur” kila ong.
Pule lang ia kane: Hiar sa ka Myntri bad ki MLA ka VPP sha Iewduh ba shah ot kilo ki marrep ki Nongrep
