Nongstoin, Naitung 11 : Ka West Khasi Hills Students Union (WKSU) kala dawa ia ka Sorkar Jylla ba kan plie noh ia ka Maternity Children’s Hospital kaba don ha Nongstoin, West Khasi Hills.
Ia kane ka jingdawa la buh hakhmat u Mission Director ka National Health Mission u Ram Kumar ha ka jingleit buh dorkhas hynne ka sngi.
U President ka WKSU samla Despitol Sun u iathuh ba u Ram Kumar ula pan por haduh phra taiew lane arbnai na ka seng haba pyntip ba ka NHM ka dang ap ban ioh ia ka jingmynjur ia ka mang tyngka na ka Tnad Planning bad Finance ban mang pisa ha kaban thied ia ki tiar ai jingsumar ia ki longkmie ba kha khunlung lem bad ki Khunlung nalor ban thung nongtrei ha kane ka hospital kaba 50 jingthiah.
“Ka Seng kala rai ban ap ia kane ka por bala kular da une u Heh ka NHM” ula ong haba maham ba lada kane ka jingkular kam urlong, ka seng kam banse ban shim da ki sienjam kiba tyngeh.
