Shillong, Risaw 06 : Ka Voice of the People Party (VPP) hynne ka sngi palei, kala dawa ia u Myntri ka Tnad kam pohiing bad ka Pule Puthi ma Lahkmen Rymbui ba un hiar shuki namar ka jingpyndonkam palat pud ki Pulit ia ka bor pyrshah ia ki nonghikai kontrak bad ka jingpynduh ia ka hok jong ki ban kamai jakpoh.
Kane ka seng sain pyrthei kala dawa ruh ia ki Pulit ba donkti ban siat ia ki bomb pynsat khmat sha ki nonghikai ba iakhih ba ki dei ban shah pynngat ha ki kyndon ain namar kane ka jingjia ka dei ka jingpynkhein ia ka hok longbriew.
Ha ka kyrwoh, u General Secretary ka VPP Dr Ricky AJ Syngkon ula ong “U Myntri ka Tnad kam pohiing bad ka Tnad pule puthi u dei ban shim ia ka jingkitkhlieh bad ban iehnohkam mardor bad ruh ba ki pulit ba donkti ha kane ka jingleh donbor ba kin shah pynngat ha ki kyndon ain naba ka jingleh jong ki ka dei ka jingpynkhein ia ka hok longbriew”.
“Kane ka jingleh tohmet pyrshah ia ki nonghikai kontrak ha ka 6 tarik Risaw, ka dei kaba hap pynrem jur da baroh ha ka imlang sahlang” ula bynrap.
Ula ong ba ka sorkar kala shim ia ka rai ban nym pdiang ia ka jingdawa jong ki nonghikai kontrak bad kane ka dei ka jingduh ia ka hok jong ki ban kamai jakpoh.
