Shillong, Iaiong 04: Ka seng saiñ pyrthei Voice of the People Party (VPP) hynne ka sngi ba-ar, kala shim ia ka rai ban phah jingthoh sha u Myntri Rangbah ka jylla bad u Shongknor ka Meghalaya Legislative Assembly ba dawa ban khot iaka dorbar ba kyrpang na ka bynta ban iatai iaka jingpyntreikam iaka Roster System jong ka Reservation Policy ka Jylla.
Ka VPP kala shim ia kane ka rai ha ka jingialang jong ka party hadien ba ka Iingkashari Meghalaya High Court kala kyntait ia ka PIL ha ryngkat ka jingong ba ia ka rai halor u snem ot kyrteng (cut-off date) ba naduh u snem aiu ba ka Roster kan sdang treikam, la ieh ha ka jingiatai hapoh ka Iingdorbar Thaw Ain ka Jylla.
“Khnang ban wanrah iaka jingsngewthuh paidbah iaka jingktah ka roster system khlem da wanrah shwa iaka jingpynkylla ha ka rukom bhah kam, ka seng kala shim ruh ia ka rai ban pynlong ia ki jingialang paidbah ha ki nongbah jongki district bad ki sub-division ha kine ki sngi ban wan” pyntip u Nongaiktien ka VPP Dr. Batskhem Myrboh.
Ula iathuh ba ha katei ka jingialang, la rai ruh ban ai iaka jingpynshai paidbah shaphang ka jindonkam ban ieng rangbah pyrshah iaka jingpyrshang ban thyngian jubor ia kawei ka ktien ha ka Ri India baroh kawei bad ka jingdonkam ban pynrung noh iaka Ktien Khasi bad Ktien Garo ha ka Khyrnit ba phra jongka Riti Synshar ka Ri India.
U Bah Myrboh ula iawer ia ki paidbah ban ia wan sngap iaki jingpynshai ka seng bad ia ki tarik ban pynlong ia ki jingialang yn sa pyntip kham hadien.
Pule lang ia kane: Assam: Shah kem u dkhot ka ULFA(I) bad u nongiarap na Dibrugarh
