Shillong, Nailur 12 : Ka Thma U Rangli Juki (TUR) ha ka sngi Palei, kala dawa ia ka Sorkar Jylla ban khang ia ka jingtyrwa ban pynlong ia ka jingiaid paidbah ban “Iada ia ki masi” jong ka seng Jagatguru Shankaracharya Swami Avimukteshwarananda Saraswati, kaba la buh ban long ha ka 2 tarik Risaw ha Shillong.
“Ngi pynrem jur ia ka jingpynsngew pher niam jong une u Nongialam niam Hindu, Jagatguru Shankaracharya Swami Avimukteshwarananda Saraswati, na ka bynta ka jingiaid paidbah ban iada ia ki masi lane ka “Gau Dhwaj Sthapana Bharat Yatra ha Shillong ha ka 2 tarik Risaw” ong ka Nongialam ka TUR kong Angela Rangad ha ka kyrwoh.
“Kane ka jingkhot bad jingdawa ban khang ban ot doh masi ha ka Ri India ka dei ka mat ba ka kynhun shit niam ba heh paid jong ka niam Hindu ka thmu ban pynbor ia kiwei pat ki jaitbynriew kiba pher kiba im ha Ri India ban im, ban bam bad ban ngeit kumba ngeit ma ki, ki heh paid Hindu. Phewse, kane ka long pyrshah ia ka Riti Synshar ka Ri bad ka wanrah ia ka jingpyniapher niam bad ka dei ruh ka jingleh donbor jong ki shitniam heh paid Hindu kiba thmu ban synshar donbor ia ka Ri India bad kiba thmu ban phrung jubor ha ka synshar khadar bad imlang sahlang tang kawei ka ktien, kawei ka niam bad kawei ka kolshor” kala ong.
Ka kong Angela kala ong “Ka pyrthei India ka dei ban tip ba ki nongshong shnong ka Jylla Meghalaya ki dei kiba bam doh, naduh ka doh sniang, ka doh masi bad kiwei ki jait doh. Ki don ruh ki shnong hapoh ka Jylla Meghalaya ha kaba ki trai ri ki pyndonkam ne pyniap da ki sniang , ki masi ha ka phur ka siang ne ka knia ka khriam. Kumta ka jingthmu ban pynlong ia ka jingiaid paidbah ban khang ot doh masi bad ban pynieng ia kata ka lama ban iada ne mane ia ka masi ha Nongbah Shillong kam dei ka hok ban mane blei laitluid , hynrei ka dei ka jingpynibor bad ka jingsdang jong ka jingsynshar donbor ki kynhun shit niam ka niam heh paid Hindu”.
“Ka TUR ka pynrem jur ia kane ka jingthmu bad ka jingwan jong kane ka kynhun shit niam Hindu kaba wanrah ia ka jingkulmar. Ka TUR ka dawa na ka Sorkar bad bor District ba kim dei ban ai jingbit bad ba ka Sorkar Meghalaya ka dei ban khang shi syndon ia ka jingtreikam kane ka seng ha ka Jylla” kala dawa.
Ka Kong Angela kala maham da kaba ong “Lada ka Sorkar ne bor District kim khang ia kane ka jingialang paidbah kaba la khot da kane ka kynhun shit niam Hindu ha ka 2 Risaw 2024, ka TUR ruh ka khot ia baroh ki nongshong shnong kiba ngeit ha ka Riti Synshar bad kiba ieid ia ka jingsuk bad jingshong suk ban ialum ha kajuh ka jaka ba pynlong ia kata ka rally khang doh masi bad ban pynlong da ka jingia bam doh masi bad kiwei dei ki jait jingbam tynrai jong ki trai ri trai muluk ka Jylla Meghalaya”.
 ha ka sngi Palei, kala dawa ia ka Sorkar Jylla ban khang ia ka jingtyrwa ban pynlong ia ka jingiaid paidbah ban “Iada ia ki masi” jong ka seng Jagatguru Shankaracharya Swami Avimukteshwarananda Saraswati, kaba la buh ban long ha ka 2 tarik Risaw ha Shillong.){kind=link}